___Qamişlo___
Saziya Materyalan a girêdayî Rêveberiya Xweser di qonaxa dawî ya nûkirina materyalên dibistanan de çapkirina materyalên polên 9 û 12'an temam kir. Materyalên nûkirî, wê di sala perwerde û fêrkirinê ya 2026-2027`an de li dibistanan werin belavkirin.
SALA 2024'AN DEST PÊ KIRIN
Saziya Minhacan (Materyalan) a Rêveberiya Xweser sala 2024'an de dest bi pêvajoya guhertina materyalên dibistanên seretayî, navîn û amadehî kiribû.
Di qonaxa yekemîn de materyalên polên 1, 4, 7 û 10'an hatibûn nûkirin û di sala xwendinê ya 2024-2025'an de dest bi bikaranîna wan hatibû kirin.
Di qonaxa duyem de jî materyalên polên 2, 5, 8 û 11'an hatin nûkirin û sala xwendinê ya 2025-2026'an li dibistanan hatin belavkirin.
Di qonaxa sêyemîn de ku Tîrmeha 2025'an dest pê kiribû, materyalên polên 3, 6, 9 û 12'an hatin nûkirin. Bi vê yekê hemû marteryal hatin nûkirin û dê di sala xwendinê ya 2026-2027'an de li dibistanan bên belavkirin.
BEŞÊN MATERYALAN
Materyalên hatine nûkirin ev in; Zimanê Kurdî, Zimanê Erebî, Zimanê Îngilîzî, Bîrkarî, Fîzîk, Kîmya, Biyolojî, Zanistên Civakî, Dîrok, Erdîngarî, Felsefe, Wêjeya Kurdî, Perwerde û Werzîş, Wênesazî, Muzîk, Çand û Exlaq, Civaknasî û Jineolojî (refa 12).
PEYMAN ÇI DIBÊJE?
Li gorî peymana 29‘ê Çileyê ya di navbera QSD û hikumeta demkî de, nîqaşên li ser çêkirina pergaleke perwerdeyê ya yekbûyî dê dewam dikin û dê perwerde li gorî materyalên Rêveberiya Xweser di salên 2025-2026‘an û 2026-2027'an dewam bike heya ku li ser pergaleke yekbûyî lihevkirin çêbibe.
