DiyarName.Com

___Cemil Oguz___

Maça nîv fînalê ya dawî di navbera Îngilistan û Arjantînê jî temam bû: Arjantin bi 2-1'ê bi ser ket û çû fînalê. Arjantînê di sala 2022'yan de jî ev kûpa girtibû dixwaze dûbleyê çêbike..

Maça ku ji bo fînalê dê reqîbê Spanyayê diyar bike li Stada Atlanta dest pê kir. Li aliyek Arjantînê ku 2022'yan de li Qetarê ev kûpa girtibû dixwest duble bike; li aliyê din Îngilistanê ku ev 60 sal bûn ev kûpa carek din negirtibû dixwest here fînalê.

Her du tîman serketin dixwest, her duyan fînal dixwest. Her duyan û nav û navnîşan, nas û pênase dixwest. Di rewşeke wisa de maçê reqabeteke gelek mezin dest pê kir. 15 deqeyên pêşî her dijwar bû; bi faûalan derbas bû. Her du aliyan jî her lîstikvanên hev li erdê dixistin; bi vî awayî nedihiştin bilîzin. Di nîveka pêşî de tenê ev yek derket pêş. Kêm şût, kêm pozîsyon lê maçeke ku hêvî dihêle ji bo 45 deqeyên din.

45 DEQEYÊN XWEŞ LI PÊŞ ME BÛN
Di 45 deqeyên duyem de maçeke xweştir li pêşberî temaşevanan bûn. Her tişt hebû; pozîsyon hebûn, şût hebûn, pas hebûn, reqabet hebû û daxwaza serketinê hebû; ev hemû di lûtkeya herî bilind de bûn. Di rewşeke wisa de deqe 55; Morgen Rogers gog şand ber keleha Arjantînê, ji bo Anthony Gordon tenê lêdan mabû: 1-0.
Îngiliz bi coş bûn, îngilîzan stand dihejand. Îngîlistan derketibû pêş lê Arjantînê ku dest ji maçê berde tune bû li holê. Messiyê ku carek din ev kûpa dixwest hebû. Bi taybetî piştî 75'an hê zêdetir Arjantîn bi bandor bû. Pozîsyon hebûn, şût hebûn û helbet di encamê de dê gol jî hebana.
Îngilistan piştî golê vekişiya bû paş, parastineke xurt dikir, bi 10 kesan parastin dikir, golavêj Kane jî li parastinê bû. Belkî dixwestin wisa bi ser bikevin, lê hesabê Arjantînê nekiribûn, loma jî karîn 85 deqe ber xwe bidin.
Deqe 85; Fernandez deqeyek berê şûtek mikemel avêtibû lê encam tune bû; vê carê encam diyar kir: 1-1.
Arjantînê ku ji serê maçê ve heta niha bi Messi her korner bi pasdayînê bikar anî bû, dîsa wisa kir. Ji ser xala kornerê re Messi gog da hevalê xwe, dîsa gog bi paş ve girt û ji bo Enzo Fernandez şand: Fernandez bi qasî ku Pickford vê carê nikare xwe bigihîne gogê lê da. Pickfordê gelek gog ji kelehê derxistibû vê carê bi bê hêvî li erdê dirêj bû. Wekhevî çêbûbû û serdestiya moralê ketibû destê Arjantînê.

90 deqe temam bûn, hakêm 9 deqe li maçê zêde kirin. Maç li holê bû, wekhevî hebû, lê Arjantîn hê zêde bi mora bû. Tîma ji paş hatibû û wekhevî bi dest xistibû, wekî maçên berî vê dîsa dixwest dinyayê bo xwe bizivrîne, dinyayê li dor xwe bizivirîne. Wisa kir jî: Deqe 90+2; Messi carek din li meydanê bû; Vê carê gog ji bo Lautaro Martinez şand. Ew gog çawa şand, ew gog çawa bilind kir, ew gog çawa çû pêş kelehê kesî nedît û Martinezî encam diyar kir: 2-1.

Bi vê serketinê Arjantîn çû fînalê û bû reqîbê Spanyayê. Îngilistana îro û Fransaya ku duh têk çûbû, dê maça sêyemînî bilîzin.

KÎ ÇEND CARAN KÛPA GIRTIYE?
Heta niha ev dibe 23 caran ev tûrnûva li dar dikeve; serdestî di destê Brezîlyayê de ye. Herî zêde Brezîlyayê bi 5 caran ev kûpa girtiye. Dûre Almanya û Îtalya bi 4 caran tên. Dûre bi rêzê Arjantîn 3, Fransa û Uruguay 2 û Îngilistan û Spanyayê jî her yekê carek ev kûpa girtiye.

ÇEND GOTIN BO MESSI
Messi di hemû maçên Arjantînê yên îsal de sembola hêviyê bû, her carê hewl da û gelek caran tîma xwe ji têkçûnê rizgar kir; îro jî heman tiştek kir. Ew lehengekî taybet bû. Ew sembola serketinê bû. Ew kesê dest ji berxwedanê bernade bû di vê maçê de jî dest ji berxwedanê ber neda. Encam? Encam "Berxwedan jiyane" bû bo Messi; encam "Berxwedan Jiyane" bû bo Arjantînê. Di maça ku tîma wî bi 1-0 bi paş ve ketibû de du caran asîst kir û encam hat serketinê.
Messi di vê tûrnûvayê 10 asîst kirin û rekora Maradona jê girt. Di Kûpayên Cîhanê de Maradona 8 caran asîst kiribû û rekor di destê wî de bû; Messi îro bi 2 asîstan hejmara asîstên xwe derxist 10'an û rekor bi dest xist.
Li aliyê din Messi bi golên ku avêtine (21 gol) bûye lîstikvanê ku di Kûpayên Cîhanê de herî zêde gol avêtine. Dûre Mbappe bi 20 golan tê. Miroslav Klose bi 16 golan tê ku berî vê tûrnûvayê ev rekor di destê wî de bû.
Her wiha Messi li vê tûrnûvayê ligel Mbappe lîstikvanê herî zêde gol avêtiye ye. Yê her du yan jî 8 gol hene ji bo vê tûrnûvayê. Di vê tûrnûvayê de ji Norwecê Haaland 7 gol, ji Îngilistanê Kane û Bellingham jî her yek bi 6 golan tên.
Û Messi ji golavêjekî û ji golavêtinê wêdetir e; Messi hêvî ye bo hevalên xwe, Messi mişkê qulikan e ku ji qula herî biçûk re dikeve hundir, ji qula herî biçûk re gogê dişîne, pasê dişîne. Messi ne saniye, ji çirkeyê wêdetir e ku dikare di çirkeyek de plana defansa reqîb ser û bino bide û têk bibe. Û wisa kir jî. Messi hezkirinê, Messi pîrozbahiyê, Messi text û taca herî jor heq dike.