___Cemil Oguz___
Maça Dora 16'an a di navbera Brezîlya û Norwecê de bû, mînakeke gelek balkêş. Temaşevana bi sembola bêrên qeyikan lîstikvanên xwe sor dikirin. Û wan lîstikvanan bi 2 golên Haalandî tîma Brezîlya şand mal..
Brezîlya di hemû tûrnûvayên Kûpaya Cîhanê de tîmeke wisa ye ku herî zêde gol avêtiye. Lê li aliyê din Brezîlya di maçên li hemberî Norwecê de ne bi sûd e û ne serketî ye. Di sala 1998'an de Norwecê Brezîlya bi 2-1 têk biribû; di sala 2006'an de ew 1-1 wekhev mabûn.
Li aliyê din li Norwecê Haaland di vê tûrnûvayê de bi 4 golan, li Brezîlyayê Junior Vinicius bi 4 golan di nav golavêjên vê tûrnûvayê de bûn. Her duyan jî dixwest bilêtên çarîk fînalê bikin bêrîka xwe.
Maçê wisa dest pê kir. Gelek kesî Brezîlya wekî favorî nîşan didan lê Norwecê hêzeke xweşik a temaşevanan û lihevkirina lîstikvanên xwe dabû pişta xwe û ketibû rê, heta vê maçê hatibûn.
Di vê maçê de herî zêde her du qeleparêz derketin pêş. Li Norwecê keleparêz Nyland ku pêşî li penaltiya Bruno Gimaraes jî girt, ji bilî vê gelek pozîsyonên serketî yên Brezîlyayê têk birin. Wî di serketina tîma xwe de roleke gelek mezin lîst. Her çiqas qeleparêzê brezîlî Becker jî pêşî li gelek golan girt jî, lê Nyland tiştek din bû.
Norwecê gelek bi gogê dilîst, her pas didan hev; sêqorziyên biçûk çêdikirin û gog didan û distandin. Armanc ew bû ku her gog di destê wan de be. Encax wisa dikarîn lîstikvanên brezîlî bidin sekinandin. Di temamê maçê de Brezîlyaya ku 313 pas saz kiribûn, Norwecê ji du qasî zêdetir, 653 pas dabûn hev. Di serketina pasdayînê dirust de Brezîlya di asta sedî 88'ê de bû, lê Norwec bi sedî 91'ê li pêş bû, yanê hê serketîtir bû. Brezîlyayê ji 12 şûtan tenê 4 jê şûtên wan bi îsatbet bûn, berevajî, ên Norwecê ji 9 şûtan 5 jê bi îsabet bûn.
Yek ji xala girîng jî lîstikvanên Norwecê qadeke fireh, cihê zêde bazdanê, cihê zede lîstina bi gogê neda lîstikvanên jîr ên Brezîlyayê wekî Junior, Martinelli, Camerio û hwd.
Û helbet cihek Erling Haaland lê hebe, gol nebe nabe. Heta 10 deqîqeyên dawî ji her du aliyan êrîş û pozisyon hebûn, lê dengê golê nebû. Di deqîqeya 79'an de Schjelderup gog bilind kir, Haalandê ku xweş dizane çi bike, gavek derket pêş û bi serê xwe lê dan: 1-0. Gabrielê ku heta niha her Haaland pê girtibû, pêve zeliqî bû, di vê deqîqeyê de ew jî bela wela bû.
Vê yekê hêza morala serketinê, baweriya têkbirina Brezîlyayê li cem norweciyan xurtir kir. Piştî vê kêliyê hê zêdetir gog di bêrîka xwe mihefize kirin, li nav pasan û li nav lingan veşartin. Û deqe 90; Dîsa asist Schjelderup, dîsa gol Haaland. Schjelderup çawa gog teslîmê Haalandî kir, Haalandî li ser xêza pêşsehayê bi lingê çepê fuze şand nav tora keleha Brezîlyayê; Ne tiştekî ku Becker bike, ne tiştê ku kesek din bike tune bû: 2-0.
Deqe 90+10 de li ser navê Brezîlyayê Neymarê ku paşê ketibû maçê penaltî avêt, lê vê yekê tera Brezîlyayê nekir. Brezilyaya ku 5bcaran ev kúpa biriye mala xwe, vê carê deriyê çarîk fînalê jî nedît.
Norwec bi bêrên qeyikên xwe ku temaşevanan di vê maçê de jî ew kişandin, çû çarîk fînalê.
Norwec di dîroka xwe de cara yekê ye diçe çarîk fînalê. Norwec niha bi dilekî rehet, bi aramî wê here razê û li benda maça din be ku, ka kî wê bibe reqîbê wê.
Nîvê şevê wê Meksika û Îngilistan bi hev re bilîzin. Kîjan bi ser bikeve dê bibe reqîbê Norwecê.
HAALAND Û GOLAVÊJÊN DIN
Niha di Kûpaya Cîhanê de Erling Haaland, Kylian Mbappe û Linoel Messi her yek bi 7 golan golavêjên pêşîn in. Haaland û Mbappe di Dora 16'an de maçên xwe lîstin, Messi hê nelîstiye. Di vî warî de reqabeta mezin didome. Haaland û Mbappe derbasî çarîk fînalê bûn, Messi yanê Arjantin hê derbas nebûye.
Notek jî ji bo Schjelderupî. Schjelderup di nîveka duyemîn de ket maçê û heqê maçê jî bi du asistan da. Wî jî çepikên mezin heq kirin.
Notek jî ji bo Nemar: Lîstikvanê brezîlî Neymar ku demek li Barselona, PSG'ê jî lîstibû çûbû El Hîlalê, ji par de jî li tîma welatê xwe li Santosê dilîze. Piştî maçê Neymarî hêsir barandin û ji bo çapemeniya Brezîlyayê axivî, "Min ceriband, lê bi dawî bû. Ez êdî li vir dest jê ber didim." Neymarê ku demên dawî gelek caran seqet bû, kêm di lîstikan de cih girt. Di maça duh de jî deqeya 67'an de ket maçê.
ÎNGILISTANÊ MEKSÎKA ŞAND MAL
Di maça din de Îngilistan û Meksika hatin hemberî hev. Îngilîz bi 3-2 bi ser ketin. Di maça ku lîstikvanê îngilîz Jarel Quansah deqîqeya 54'an de qerta sor dît û îngilîzan 40 deqe bi 10 kesan lîst de jî bilêta çarîk fînalê girtin.
Îngilistanê di deqîqeya 36 û 38'an de bi golên Jude Bellingham şoqek mezin li Meksîkayê da. Meksîkiyan 42'yan de bi Julian Quinones bersiv da.
Li ser navê Îngilistanê Harry Kane deqeya 60'î de ji penaltî encam bir 3-1, piştî vê bi 9 deqeyan Raul Jimenez li ser navê tîma xwe bersiv da lê têrê nekir: 3-2.
Îngilistan di çarîk fînalê de bû reqîbê Norwecê.
DI KÛPAYÊ DE ÎRO
Îro jî du maç hene. Portekîz û Spanya saet 22.00'an de tên hemberî hev. DYA û Belçîka jî saet 03'ê, destê sibê tên hemberî hev.
***
Rûpela Taybet a Kûpaya Cîhanê:
- KÛPAYA CÎHANÊ 2026
***
Ji bo temamê maçên rojê:
- Roj bi roj maçên Kûpaya Cîhanê (temamê lîsteyê)
***
DIBE EV NÛÇE-NIVÎS BALA WE BIKIŞÎNIN:
- Paraguayê panzêr pelixandin û got: Cihê we li vir tune ye!
- 49 mîlyon kesî nikarîn bi 438 hezar kesî!
- Maçên koman temam bûn; Va ne yên serketî, yên xeyalşikên, notên giştî
- Diyarnameyê ji Grokê pirsî, wê di Kûpaya Cîhanê kîjan welat bi ser bikeve?
Ji Messi dîrokeke nû: Di Kûpaya Cîhanê de kesê herî zêde gol avêtin
- Jê bawer nekin lê dîsa jî vê nûçeyê bixwînin
**
- Gelo di futbolê de edalet heye?
- Swîsreya bê marş, çar ziman û golên wê yên li Kûpaya Cîhanê
- Mêrxas Doskî yê kurd û sê golavêjên din
- Goga Lingan û Serê Hz. Huseyîn
- Şeva lîstikvanê kurd Denîz Undav a di Kûpaya Cîhanê de
- Ji bo cîhanê goga lingan, ji bo kurdan gef û gur û fişarên tirkan
Ger hûn bixwazin alîkariya Diyarnameyê bikin:
ÇAYEK BO DIYARNAMEYÊ:
LÎNKA
Kreosus.com'ê bitikînin
LÎNKA
Patreon'ê bitikînin