ALÎ BARIŞ KÛRT - ENQERE 

Hevserokê Giştî yê BDP'ê Selahattîn Demîrtaş ragihand ku ew ji bo Hevserokatiya HDP'ê namzet e. Demîrtaş got, "Di çarçoveya pêşniyara giştî ya gel û pêşniyara hevalên xwe de, min biryar da bibim namzet."

Hevserokê Giştî yê BDP'ê Selahattîn Demîrtaş da xuyakirin ku ewê weke namzetê Hevserokatiyê beşdarî hilbijartinên li 2. Kongreya Awarte ya HDP'ê ya 22'ê Hezîranê bibe.

Demîrtaş daxuyaniya destpêkê da ANF'ê û got, "Ya rast min beriya niha dabû xuyakirin ku weke hevserok ezê di ti saziyan de cih negirim, lê siyaset û gel kîjan wezîfeyê bide me, em nikarin jê birevin. Di çarçoveya pêşniyara giştî ya gel û pêşniyara hevalên xwe de, Komîteya Amadekar a HDP'ê navê min jî ji bo hevserokatiyê xist rojevê. Min jî biryara xwe da; Ji bo Hevserokatiya HDP'ê namzet im. Em nikarin ji ti wezîfeya dîrokî birevin. Em li bendê ne ku encama nazmetiyê îro yan jî sibê bê aşkerakirin."

EMÊ DI HDP’Ê DE HEMÛ NIRXAN BIKIN YEK

Demîrtaş diyar kir ku HDP gihiştiye nokteyeke gelek girîng û got: “Nîqaş gihiştin astekê. Hedefa me ya niha eve ku di dema pêş de em HDP’ê bi hêz bikin. Bikin hêzeke alternatîf. Emê HDP’ê bikin hêviyeke mezin.”

**

Têbiniya Diyarnameyê: Me 13'yê mehê ragihandibû ku Demirtaş hatiye qanîkirin û ew dibe Hevserokê HDP'ê. Vaye ew nûçe:
- Agahiya dawî: Demirtaş dibe Serokê HDP'ê