AMED
KCD'ê di 6'emîn Komcivîna xwe ya Neteweyî de bal kişandi ser statuya kurdan û got ku kurd êdî bêstatûbûnê red dikin.

Kongreya Civaka Demoratîk (KCD) 6'emîn Komcivîna xwe ya asayi bi beşdariya 800 delegeyî pêk anî. KCD'e piştî komcivînê encamnameya civînê bi civîna çapeeniyê aşkere kir. Li ser KCD'ê Hevseroka Giştî ya KCD'ê Aysel Tûglûk encama komcivînê xwend.

Tûglûk got ku li welatên Rojhilata Navîn li dijî rejima desthilatdar têkoşînek daye destpêkirin û li Tirkiyeyê jî gel li dijî polîtîkayên AKP'ê bertekên xwe zêde dikin. Tûglûk, anî ziman ku 10 salên desthilatdariyê beramberî 80 salên komarê ne û wiha got: "Hikumeta AKP'ê bang li hikumeta Mubarek, hikumeta Qedafî û hikumeta Esad kir ku guh bide dengê gel. Lê Erdogan bi polîtîkayên tepisandin, binçavkirin, girtin û komkujiyan li dijî daxwazên gelê kurd tevgeriya. Hikumeta AKP'ê li dijî daxwazên gelê kurd ji Mubarek, Qedafî û Esad cudatir tu polîtîka nemeşand. Heman polîtîkayên şîdet û zextan li dijî gelê kurd meşandin. Heya niha zêdehî 6 hezar siyasetmedarên kurd ên siyaseta legal kirin hatin girtin. 140 şaredar, endamên meclisa şardariyê û giştî hatin girtin. Parêzer hatin girtin. Xwendekar, rojnameger, rewşenbîr û bi kurtasî hemû derdorên muxalîf hatin girtin û rastî gefên girtinê tên. Ev pêkanîn nîşan dide ku hikumeta AKP'ê şûna wesayeta leşkerî wesayeta xwe ya siyasî ava kir. Hikumeta AKP'ê bi komkujiya Roboskî helwesta xwe ya komkujî nîşan da. Em bi dengekî bilind dixwazin bêjin ku çawa Çiller encam negirt hûn jî encamê nagirin. Em dixwazin hikumet û raya giştî ya demokratîk vê yekê bizane. Hemû delegeyên Kongreya Civaka Demokratîk raman û çalakiyên siyasetmedarên kurd ên hatin girtin û niha tên darizandin dipejirîne û tevlî wan dibe. Em heman ramanan pêktînin û dê di heman rê de berdevam bikin."

'EM QET LI HEMBERÎ ZILMÊ SERÎ NATEWÎNIN'

Tûglûk, bilêv kir ku hikumeta AKP'ê bi pêkanînên dewleta polîs dixwaze hilbijêrên kurd û gel ji hev qut bike û tevgera gelê kurd parçe bike û wiha berdewam kir: "Em qet li hemberî zilm û zordariyê serî natewînin. Bila her kes baş zanibe ku gelê kurd êdî ders ji dîrokê derxistiye û tu carî li hemberî van polîtîkayan têk naçe. Çawa ku ev polîtîka di salên 90'î de bi ser neketin dê ji niha û şûnde jî bi ser nekevin. Li hemberî van polîtîkayên înkar û îmhayê gelê kurd dê di ber xwe bide û têkoşîna berxwedanê pêş bixe. "

'ŞÊX SEÎD, SEYÎD RIZA, OCALAN'

Tûglûk, destnîşan kir ku Abdullah Ocalan ji bo gelê kurd pir girîng e û wiha berdewam kir: "Tecrîda li ser Birêz Ocalan tê meşandin niha dixwazin bikin zagonî. Bila her kes baş zanibe ku gelê kurd û nûnerên gelê kurd tu carî pişta xwe nade nirxên xwe û îxanetê bi nirxên xwe re nake. Ji bo gelê kurd Şêx Seîd, Seyîd Riza, Mele Mistefa, Qazî Mihemmed çi be Birêz Ocalan jî ew e. Kesên difikirin ku dê tecrîd bi ser bikeve xwe dixapînin. Bila her kes baş zanibe ku 12 sal in li Îmralî tecrîd bi ser neket ji niha û şûnde jî bi ser nakeve. Birêz Ocalan dixwaze pirsgireka kurd bi rêya aştî û demokrasiyê çareser bibe. Polîtîkayên tecrîd û asîmîlasyonê çareseriyê dixetimînin. Ji ber vê yekê em dixwazin dîsa pirsgirêk bi diyalog û muzakereyan çareser bibe. Divê muzakere ji nû ve dest pê bikin. Ji bo aştî û demokrasî bi ser bikeve divê Ocalan û gelê kurd karibe serbest û azad siyasetê bike. "

'KURD POLÎTÎKAYÊN BÊZIMANÎ, NASNAMEYI Û BÊ STATUYÊ RED DIKE

Tûglûk, da zanîn ku êdî gelê kurd jî dixwaze wekî hemû neteweyên cîhanê xwedî nasname, ziman, çand, dîrok û statu bijî û êdî bê statu û bê nasnametiyê red dike. Tûglûk, bilêv kir ku êdî ev Zagona Bingehîn a  12'yê Rezberê pirsgirekan çareser nake û xwest di Zagona Bingehîn a nû de hemû mafên gelê kurd ê nnasname, ziman, çand, statu û neteweyî bê parastin û wiha dawî li axaftina xwe anî: "Daxwaza me di nava wekhevî, aştî û yekîtiyê de Tirkiyeyek demokratîk e. Xweseriya Kurdistan e. Em Xweseriyê ji bo hemû Tirkiyeyê pêşniyar dikin. Êdî divê hemû gelê kurd, nivîskar, rewşenbir, karsaz, karmend, karker, cotkar, mamoste, jin, ciwan, zarok û hemû beşên gelê kurd divê li dijî van polîtîkayên înkarê rabin ser piyan û tekoşîna berxwedanê pêş bixin. Roj roja berxwedanê ye."

***

Nûçeya eleqedar:

- Ahmet Turk: Êdî bi têkiliya kole-efendî çênabe