Enqere
BDP'ê pêşniyar da ku bûyera Roboskî bê lêkolînkirin lê bi dengên AKP û MHP'ê ev pêşniyara BDP'ê hate redkirin.

Di 28'ê berfanbara 2011'an de, di encama bombekirina ji aliyê balafirên şer ên dewleta Tirkiyeyê de 34 gundiyên Roboskiya Qilabana Şirnexê hatin kuştin. BDP'ê ji bo ev bûyer bê lêkolînkirin pêşniyarnameya avakirina Komîsyona Lêkolînê ya ji aliyê Meclisê ve da Meclisa Tirkiyeyê. Pêşniyarnameya BDP'ê hat Lijneya Meclisê û nîqaş li ser çêbû. Berdevkê Serokê Koma BDP'ê Hasip Kaplan got: "4 saet dîmenên Heronan ên di destê we de, we çima ji dozger re neşandin, çima biryara veşarîbûnê dan? Ji ber bûyerê re 26 roj derbas bûne çima heta niha kesek tenê jî wekî bersûc gazî wî nekirine ku bê dadgehê? Ev mijareke ku cezaya navneteweyî lê binêre."

Piştî axaftina pêşniyara BDP'ê ji bo dengdanê hate pêşkêş kirin. Bi dengên AKP û MHP'ê pêşniyara BDP'ê hate redkirin û bi vî awayî jê êdî Lêkolînkirina Meclisê ya ji bo bûyerê betal bû.