ÊRIŞ QOSER / SILÊMANÎ

Qeymeqamê navçeya Helebçeyê Goran Edhem Rehîm li ser komkujiya li gundê Roboskî got ku her bûyerên ku li Kurdistanê diqewimin me hemûya eleqeder dikin.

Qeymeqamê navçeya Helebçeya Silêmaniyê Goran Edhem Rehîm, li ser bûyera ku li gundê Roboskiya Qilabana Şirnexê qewimî û têde 35 ciwan û zarokên kurd jiyana xwe ji dest dan axivî û diyar kir ku êdî kurd bi êşên hev du nerehet dibin.

Rehîm di berdewama axftina xwe de bal kişan ser serkeftina kurdan û got: “Di serî de ez êrîşa dewlata tirk bi tundî şermezar dikin. Her bûyerên ku li Kurdistanê diqewimin me hemûyan eleqedar dikin. Piştî erdheja bajarê Wanê li bakurê Kurdistanê bi bûyera gundê Roboskî em jî wekî hemû kurdan pê ne xweş bûn. Her wiha, gelê kurd bi çalakiyên ku li her deverê li dar xistin ev êrîşa nemirovane şermazar kirin û xwestin bala qada navnetewî bikşînin ser vê bûyerê. Her bûyerek ku li Kurdistanê diqewimin ji me re birînek e. Ya girîng ew e ku mirov bikaribe di demên nexweş de bi hev re bibe alîkar. Îro gelê kurd vê yekê pêk tîne. Her bûyerek li Kurdistanê diqewime kurdên li parçeyên din jî pê diêşin. Pêwîst e gelê me di rojên zehmetiyan de bi hev re bibe alîkar û êşê hev parve bikin. Ger gelê me bi hev re yekîtiyek xurt çêbike serkeftina kurdan jî wê di demek nêz de bi awayekî xurt pêk were.”

ANF