Diyarname
35 kurdên ku duh li gundê Roboskî ya Qilabana Şirnexê bi bombebarana balafirên dewleta Tirkiyeyê hatin kuştin îro bi merasimeke mezin hatin definkirin. Di merasima definkirina cenazeyên 35 gundiyên kurd de li dor 30 hezar kesî hebû.

Hevserokên BDP'ê Sehalattin Demirtaş û Gultan Kişanak, Selahattin Demirtaş, Hevserokên KCD'ê Aysel Tugluk û Ahmet Turk, mebûsên BDP'ê, şaredarên bajar û navçeyên BDP'ê, rêveberên BDP'ê yên navendî û yên bajaran, nûnerên KESK, DÎSK, Yekîtiya Baroyên Tirkiyeyê, MAZLUMDER, Yekîtiya Tabibên Tirk, rêveberên ÎHD'ê nûnerên saziyên sivîl, Azad Goyî (ku li ser navê Serokê Herêma Kurdistana Federal Federal Mesud Barzanî hatibû) û heyeta pêre di merasimê de amade bûn.

'Yên ji Esad û Qedafî re dibêjin, bila li xwe binêrin'

Di merasima cenazeyêde Hevserokê KCD'ê Ahmet Turk axivî û got: "Yên ku qala komkujiyan dikin, ma ev ne komkujî ye çi ye? Yên ku qala komkujiyê dikin, komkujî çi ye bila ji min re qal bikin. Digel ku dizanîn li ser sînor gundiyên mehsûm hebûn dîsa jî bombe kirin û 35 kes şehîd kirin. Yên ku Esad û Qedafî rexne dikin îro tiştên ku kirine ji Esad û Qedafî zêdetir e. Ew gele xwe bombe nakin. Ev komkujiya ku ne kêmî komkujiyên Sedam û Qedafî ye dê di nav dîroka komkujiyê de cihê xwe bigire. Serokwezîr Erdogan jî dê wekî 'Serokwezîrê Komkujîkar' di nav dîrokê de cihê xwe bigire. Em niha têkoşina mirovahiyê û rûmetê didin. Em wekî KCD û BDP emê tevî gelê xwe têkoşîna xwe roj bi roj bilind bikin. Ji ber ku berxwedan jiyan e."

'Bila bizanibin gelê kurd ne bêxwedî ye'

Hevserokê BDP'ê Selahattin Demirtaş jî wisa got: "Çapemeniya tirk bi lehengiyeke mezin komkujiya ku li vê derê hatiye kirin veşartiye. Ger di êşeke wisa de em êşên xwe bi hev re par ve nekin, em bibêjin 'êşa ku hatiye jiyîn ê kurdan e' wê çaxê tam cudaxwazî pêk hatiye. 35 kes bi bombeyên balafiran hatine kuştin. Bi ser re 24 saet derbas bûne Serokomar derketiye û sersaxiyek jî nedaye. Muxalefetê sersaxî nedaye me. Serokwezîr derketiye û negotiye bila serê malbatê sax be. Gotina 'Ev êşa we ye'. Bila bizanibin ku gelê kurd ne bêxwedî ye. Yên ku cenazeyan û bedenên parçebûyî nabînin bila bizanibin ku dê ev ciwan vî welatî azad bikin. Li hemberî yên ku bûyerê vedişêrin, wekî ku tunebe dihesibînin dê têkoşîna azadiyê wekî çiyayan bilind bibe."

Li ser gotina Berdevkê AKP'ê Huseyin Çelik ku BDP wekî provakator bi nav kiribû jî Demirtaş reaksiyon nîşan da û got: "Komkujiya ku hatiye kirin li holê ye, bêyî şerm bikin me wekî provakator nîşan didin. Ew nehatine vê derê sersaxî, walî jî hatine vê derê ji bo cenaze bi hev re neyên definkirin, bi hev re şîn neyê dayîn malbat tehdîd kirine. Lê bila bizanibin ku me hemûyan bidin ber şûran jî, tu tiştekî nemîne jî dê di dawiyê de destên te yên bi xwîn û yê me jî têkoşîna me ya serbilind bimîne. Niha dikin ku komkujiyê veşêrin. Li holê komkujiyeke bi plan û program heye. Li ser navê me yê ku bi pav gav biavêje bila namend be."