Kobanî
Rêveberiya Xweser a bajarê Kobanê têkildarî tayînkirina şaredarê bajarokê Çelebiyê ji aliyê hikumeta demkî ya Sûriyeyê ve, xwepêşandanên gel ên li hemberî tayînkirinê û êrîşa hêzên hikumeta demkî yên li ser xwepêşandêran daxuyaniyek da.

Roja 2'yê mehê daxuyanî li pêşiya avahiya Rêveberiya Xweser a Kobanî hate dayîn. Endama Koordînasyona Kongra Star a bajarê Kobanê Peyman Elûş daxuyanî bi zimanê kurdî xwend.

Di daxuyaniyê de wiha hat gotin: “Li gorî peymana 29'ê Rêbendanê/Çileyê ya di navbera Hêzên Sûriyeya Demokratîk (QSD) û hikumeta demkî ya Sûriyeyê de hat îmzekirin, divê entegrasyon bihata kirin û îradeya gelê herêmê bihata naskirin. Di heman demê de divê rêveberên saziyên ji aliyê xelkê herêmê ve bihata tayînkirin û ji xelkê herêmê bi xwe bin. Li ser vê bingehê, parêzgarê Hesekê û hejmarek ji rêvebirên din ji nav xelkê parêzgehê hatin tayînkirin. Lê belê, ev pêvajo li herêma Kobanî nehat cîbicîkirin û rêveberên saziyên herêmî ji derve têne tayînkirin. Heta niha, rêveberek ji bo herêmê û rêvebirên herêmên Sirîn û Çelebiyê bêyî ku van biryaran bi xelkê Kobanî re nîqaş bikin hatine tayînkirin.

Ev gavên ku ji aliyê rêveberiya Parêzgeha Helebê ve hatine avêtin, ne li gorî naveroka peymana 29'ê Rêbendanê ne. Rêveberiya parêzgeriyê pabendî bendên peymana entegrasyonê ya ku ji aliyê hikumeta demkî ya Sûriyeyê bi Hêzên Sûriyeyê Demokratîk re hatiye çêkirin nabe. Ev kiryarên ku ji aliyê rêveberiya parêzgereyê ve hatine avêtin, pêkanîna entegrasyonê asteng dikin.

Piştî ku rêveberiya parêzgeriya Helebê rêveber ji bo saziyên navçeya Çelebiyê tayîn kirin, xelkê Kobanî û navçeya Çelebiyê li navçeyê kom bûn da ku helwesta xwe li ser van gavan diyar bikin, lê Hêzên Ewlekariya Hundirîn û hêzên leşkerî yên girêdayî hikumeta demkî bi awayekî tund destwerdan kirin û nehiştin ku xelk daxuyaniyê bide. Ji vê zêdetir êrişî xelkê kirin û hewildan ku hinekan ji wan bigirin.

Em, wekî rêveberî û gelê Kobanî, van kiryaran şermezar dikin. Em bang li hikumeta veguhêz dikin ku pabendî xalên peymana 29'ê Rêbendanê bibe û pêvajoya entegrasyonê li gorî wê bicîh bîne. Em teqez dikin ku em ê ji bilî vê tiştekî din qebûl nekin.”