Diyarname

Hevserokên HDP û BDP’ê, parlamenterên HDP’ê û şaredarên BDP’ê, rêveberên her du partiyan, bi armanca piştgiriya berxwedana Kobanê ya li dijî êrîşên DAIŞ’ê, wê roja 9’ê Tîrmehê biçin navçeya Pirsûsa Rihayê ya li ser sînorê Kobanê.  

Serokê Rêxistina BDP’ê ya Rihayê Celalettîn Erkmen derbarê mijarê de daxuyaniyek da û got: “Roja 9’ê tîrmehê em ê li Pirsûsê çalakiyek demokratîk lidar bixin û wê hevserokên giştî, parlamenter, rêxistinên bajar û navçeyan û şaredariyên me tevlî bibin.”

Erkmen, bal kişand ser banga seferberiya Kantona Kobanê û got ku wê rêxistinên wan ên navçe û bajaran bi hişmendiya seferberiyê kampanyayên piştgiriyê pêk bînin. Erkmen bang li hemû welatiyan jî kir ku tevli kampanyayê bibin.  

Li Ewropa KCD-E dê çalakî li dar bixe

Kongreya Civaka Demokratîk a Ewropayê (KCD-E) bi daxuyaniyekê bal kişand ser banga seferberiyê ya rêveberiya Kantona Kobanê û Koordînasyona Kantonên Rojava û ji hemû kurdistaniyên li Ewropayê xwest ku bi rihê seferberiyê bersivê bidin vê bangê. KCD-E xwest ku kurdistanî li her deverê çalakiyên demokratîk lidar bixin.

KCD-E wisa got: "Em bang li Kurdistaniyên li Ewropayê dijîn bi taybetî jî yên li Berlîn, Frankfurt, Stockholm, Kopenhagen, Viyana, Atîna, Bruksel, Parîs, Marsîlya, London, Bern û Den Haagê dikin, ku xwedî li berxwedana Kobanê derkevin û li cihê lê ne çalakiyên demokratîk pêk bînin. Di serî de Kantona Kobanê pêwîste ji tevahiya şoreşa Rojava re alîkariya maddî, çalakî û siyasî di asta herî bilind de bê dayîn. Ji bo vê jî em bang dikin ku li her deverê bi ruhê seferberiyê xebat bê meşandin û her kes ji bo Rojava rabe ser piyan."

**

Nûçeyên eleqedar:

- Ji KNK'ê banga xwedîderketina li Kobanê

- 'Li Kobanî bi sedhezaran kes bêne kuştin wê wijdana Barzanî jî pê biêşe' 

- Salih Muslim: ‘Kobanî têk biçe dê vîna kurd bişkê'

- Pêşverû û Yekîtî: Em ji bo parastina Kobanê amade ne

- Kordînasyona kantonên Rojava tevlî serferberiya Kobanê bû

- Hikumeta Kobanê seferberî îlan kir