KOBANÊ 
Hikumeta Kantona Kobanê bi daxuyaniyekê seferberiya gîştî li herêmê îlan kir û bang li hemû kesên ku dikarin çek hilgirin kir ku tevlî çeperên berxwadan û rûmetê ji bo parastina Kobanê bibin. Her wiha bang li hêzên Kurdistanî kir ku erkên xwe li pêşberî berxwedana gelê herêmê bi cih bînin û piştgiriya vê berxwedana dîrokî bikin.

Li hemberî êrîşên dijwar ên çeteyên DAIŞ'ê yên li dijî herêma Kobanê ku di 2'ê Tîrmehê de dîsa dest pê kirin, Hikumeta Kobanê bi daxuyaniyekê seferberiya gîştî li herêmê îlan kir. Di daxuyaniyê de hat diyarkirin ku êrîşên li dijî herêmê bi nêzîkbûna salvegera şoreşa 19'ê Tîrmehê ya ku gelê kurd tê de herêmên xwe rêzgar kirin re heman wext in û wiha hate gotin: "Bi nêzîkbûna 2'yemîn salvegera şoreşa 19'ê Tîrmehê ku gelê kurd vîna xwe ya azad û rêzgarkirina herêmên xwe ji dagirkeriyê tê de îlan kirin re, hêzên tarî û dewletên ku piştgirya wan dikin êrîşên xwe li dijî herêmên me bi armanca têkbirina destketiyên şoreşê zêde kirin û li hember herêma Kobanê dest bi şerekî giran û vekirî ku bi hezaran çete ji hemû nasnemeyên cîhanê, çekên herî pêşketî û giran û cebilxaneya ku hêzên tarî di bajarê Mûsil û bajarên din ên Iraqê de bidestxistin, tê de bikar tîne, kir."

Di daxuyaniyê de bal hate kişandin ser êrîşên ku vîna gelê kurd û hebûna wê hedef digrin û wiha hate gotin: "Êrîşên ku ji berî 3 rojan ve li gundê Zor Mixar ê rojavayê Kobanê dest pê kirin, tenê gundê Zormixar an jî bajar û herêma Kobanê hedef nagirin. Ew êrîş vîna gelê kurd, hebûn û ewlehiya wê hedef digirin. Piştî DAIŞ'ê dewleta xwe îlan kir û sînorên xwe danîn teqez bû ku ev rêxistina 'terorîst' li ber tu bendên exlaqî, olî yan jî mirovahî nasekine."

Hikûmeta Kobanê di daxuyaniyê de destnîşan kir ku sivîlên ji deverên pevçûnan koç bûne diyar kirine ku ji bilî topbarana tangan û çekên din ên giran zêdetirî 3 hezar topên hawanê li gundê Zormixarê ketine. Bi vê yekê diyar dibe ku rêxistina DAIŞ'ê welatiyên sivîl ên jin, pîr, zarokan û gundên ku welatiyên sivîl tê de ne hedef digrin."

Di berdewama daxuyaniyê xwe de hikumetê bang li welatiyên herêmê kir ku bikevin nava rewşa seferberiyê û wiha dom kir: "Wekî hikumeta herêma Kobanê em bang li gelê herêmê dikin ku li hemberî van êrîşên barbarî û hovane bibin yek" û bang li kesên ku dikarin çek rakin kir ku tevlî çeperên parastinê bibin û herêma xwe birêzin û li gelê kurd ê her çar perçeyên Kurdistanê û derveyî welat kir ku di vê rewşa awarte ya heyî de piştgiriya herêma Kobanê û gelê wê bikin."

Di dawiya daxuyaniyê de hikumetê bang li hêzên Kurdistanî kir ku erkên ku li hember berxwedaniya gelê herêma Kobanê dikevin ser milê wan bi cih bînin û piştgiriya vê berxwedana dîrokî bikin.

100 ÇETEYÊN DAIŞ'Ê HATIN KUŞTIN

Li aliyê din, di pevçûnên di 2'yê Tîrmehê roja Çarşemê li hemberî gundê Zor Mexar ê 35 km dûrî Kobanê ye destpêkirin de, tê gotin ku çeteyên DAIŞ'ê windahiyên giran dide. Li gorî agahiyan heta niha herî kêm 100 endamên DAIŞ'ê hatine kuştin.

JI FERMANDARÊ YPG'Ê BANG

Ji fermandarên YPG'ê Mahmûd Berxwedan jî da xuyakirin ku berxwedana wan a li hemberî êrîşên DAIŞ'ê dewam dike û banga tevlîbûna berxwedanê li ciwanan kir.