NAVENDA NÛÇEYAN

Kordînasyona Giştî ya Rêveberiyên Hersê Kantonên Rojavayê Kurdistanê “Cizîr, Efrîn û Kobanê” bi daxuyaniyekê bersiva serferberiya ku li herêma Kobanê hatiye îlankirin da û bang li hemû aliyên civakê kir ku ji bo parastina welatiyên Kobanê amade bin. Her wiha bang li raya giştî û civaka navnetewî kir ku berpirsiyariya xwe li hemberî êrîşên çeteyan pêk bînin û rê li pêşiya belavbûna çeteyan bigire.

Di daxuyaniyê de wiha hate gotin: “Piştî ku Rêxistina Dewleta Îslamî ya ‘Terorîst’ (DAIŞ) gelek çekên giran li bajarê Mûsilê desteser kirin û veguhastin herêmên Sûriyê ku di bin dagirkeriya wan de ne, di vê dawiyê de DAIŞ’ê dest şerê xwe yê hovane li dijî herêmên Rêveberiya Xweseriya Demokratîk kir. Hovîtiya DAIŞ’ê li herêma Kobanê jî zêdetir bû û êrîşî gundên rojavayê herêma Kobanê yên wekî Zormixar, Boraz, Dugirman û El-Beyazê kir. DAIŞ’ê di êrîşên xwe de li dijî welatiyên sivîl hemû çekên giran bi kar anîn. Di encamê de hemû welatiyên van gundan hatin koçberkirin. Dîsa gelê me rastî komkujiyên tunekirinê ku ji sûcên şer jî derbas dibin, tê. Ev êrîşên çeteyan hemû nirxên mirovî, exlaqî û ezmanî binpê dikin. Hemû êrîşên çeteyan li pêşiya çavên civaka navnetewî pêk tên, bêyî ku helwestekê nîşan bidin. Komkujiyên van çeteyan dikeve çarçoveya guhertina dîmografîk a herêmê  û hewldidin herêmê parçe bikin û ber bi kambaxî û tarîbûnê ve bibin.”

Di berdewama daxuyaniyê de wiha hate destnîşan kirin: “Îro gelê Rojavayê Kurdistanê bi tena xwe li hemberî van êrîşan ber xwe dide û buhaya têkçûna civaka navnetewî ji parastina maf û azadiyên Rojava bi hersê kantonên xwe ve dide. Şervanên YPG’ê di belavbûna çeteyan li dewletên herêmê bûne kelem. Şervanên YPG’ê tevî hemû kuştinên li ser nasnameyê û şerên mezhebî ku niha Rojhilata Navîn têre derbas dibe, ber xwe dide û parastina projeya şaristanî ku dikeve xizmeta demokrasiyê û jiyana hevbeş dike.”

Kordînasyona Giştî ya Rêveberiyên Hersê Kantonên Rojavayê Kurdistanê “Cizîr, Efrîn û Kobanê” di daxuyaniyên xwe de soz da hemû pêkhateyên Rojavayê Kurdistanê ku dê bi hemû hêza xwe li hemberî van êrîşan ber xwe bide û wiha têde hate gotin: “Em wekî Kordînasyona Giştî ya Rêveberiyên Hersê Kantonên Rojavayê Kurdistanê ‘Cizîrê, Efrînê û Kobanê’ soz didin gelê xwe bi hemû pêkhateyên Rêveberiya Xweseriya Demokratîk ku em ê li hemberî van êrîşan ku jiyana hevbeş û aştiya navxweyî hedef digire, bi hemû hêza xwe ber xwe bidin. Wekî bersiva serferberiya ku li herêma Kobanê hatiye îlankirin, em ê bi hemû hêza xwe piştgiriyê bidin vê serferberiyê. Em bang li hemû saziyan, birêveberiyan û yekîtiyên her sê kantonan dikin ku hemû derfetên xwe yên aborî, siyasî, leşkerî ji bo parastina welatiyên herêma Kobanê amade bin. Em bang li hemû welatiyên hundir û derveyî Rojava dikin ku xwepêşandaneke girseyî ji bo piştgiriya herêma Kobanê lidar bixin. Her wiha em bang li raya giştî ya navnetewî û hêzên navnetewî dikin ku berpirsiyariya xwe pêk bînin û rê li pêşiya belavbûna çeteyan bigirin û fişarê dînin ser aliyên ku piştgiriya van çeteyan dikin.”

Daxuyanî wiha bi dawî bû: “Em berxwedana gelê xwe ya bêhempa li herêma Kobanê silav dikin. Em bi bawer in ku tu carî vîna gel nayê şikandin û serkeftina gel misoger e. Em şehîdên xwe ji bîr nakin û em ê riya wan heta dawî bişopînin.”

*

Nûçeyên eleqedar:

- Hikumeta Kobanê seferberî îlan kir

-