NAVENDA NÛÇEYAN
Desteya Netewên Yekbûyî ya Jinan (UN Woman) diyar kir ku ji sedî 68'ê jinên ku koçberî Başûrê Kurdistanê bûne rastî destdirêjiya zayendî û astengkirinê tên û ev yek wekî tundiyeke mezin li dijî jinan bi nav kir. Desteyê ji Hikumeta Başûr xwest ku li gorî berpirsyartiyên xwe tev bigere û parastina koçberan bike.
Desteya Netewên Yekbûyî ya Jinan (UN Woman) duh li bajarê Hewlêrê yê başûrê Kurdistanê civîndeke çapemeniyê lidar xist. di civînê de encamên lêgerînên derbarê mafên jinan de ku li kampên penaberan ên Başûrê Kurdistanê bi alîkariya saziya dozên jinan Warfîn kirine, eşkere kir.
Nûnera Desteya Netewên Yekbûyî ya Jinan Francis Kay di civîna çapemeniyê de wiha got: "Li Iraqê û herêma Kurdistanê di 3 salên dawî de destdirêjiya zayendî ya derheqê jinan de zêde bûye. Ev tawanbariyeke pir mezin e ku li van herêman belav bûye. Di rapor û hevdîtnên ku desteya me bi koçberên jin ên li kampên penaberan re hate diyarkirin ku jin li van kampan ji aliyê rayedarên ewlekariyê (Asayîş), karmendên (muwezefên) rêxistinên mirovî yên alîkariyan û ajokarên tirimplên kirê (Taksî) rastî destdirêjiya zayendî (cinsî) tên, li gorî lêkolênên me hate zanîn ku ji sedî 68'ê jinên li kampên Başûrê Kurdistanê rastî destdirêjiya cinsî û astengiyan tên."
Francis Kay bang li Hikumeta Başûrê Kurdistanê kir ku vê mijarê baş bişopîne û berpirsyarên ku rê dan destdirêjiya zayendî di derheqê jinan de bê kirin, ceza bikin û destnîşan kir ku divê hikumet parastina jinan bike û di nava kampan de rewşeke bi ewle bi cih bike û da zanîn ku rêjeya nezanebûn û tênegihîştinê di nava jinên li kampê de ji sedî 55 e.
Ji aliyekî din ve Berpirsyara Saziya Warfîn ya Jinan da xuyankirin ku ji sedî 35 jinên ciwan ji aliyê malbatên xwe ve girtî ne da ku rastî destdirêjiya cinsî neyên, her wiha ji bo ku rastî komên fihûşê yên dûrî exlaq û edebê neyên û got: "Li kampan di şevê de hemû cureyên bê exlaqiyê têne kirin."
ANHA