Cemil Oguz

Bi ser deh rojnameyên li Tirkiyeyê di vê serdema Fûara Pirtûkan a Navneteweyî ya Stenbolê paşgoyên pirtûkan weşandin. Di nav wan de ya herî mezin a Vatan Kîtabê bû (120) û di nav wan de ne paşgoyeke a kurdan hebû, ne jî wan paşgoyên bi tirkî nûçeyek li ser pirtûkên kurdan weşandibû.

Li dinyayê gelek rojname li ser pirtûkan paşgoyên taybet didin. Li Tirkiyeyê jî wisa ye. Li Tirkiyeyê bi ser deh rojnameyan de rojname hin jê heftane, hin jê du heftane, hinek jî paşgoyên mehane didin. Heta niha van rojnameyan ji bo Fûara Pirtûkan a Navneteweyî ya Stenbolê paşgoyên taybet amade dikir lê ev taybetî îsal zêdetir xwe nîşan da. Hem bi ser deh rojnameyan de paşgo amade kirin û belav kirin, hem jî li fûarê stand vekirin û li van standan reklama xwe dikin.
Lê mixabin di nav van paşgoyan de yek jî bi kurdî nîn e. Her wiha rojnameya kurdan a bi tirkî Ozgur Gundemê ku paşgoya pirtûkan qet amade nake, di vê fûarê de jî tiştek taybet amade nekiriye.
Sedem nebûna derfetan be, sedem nebûna têkiliya weşanxaneyên kurdan û rojnameyan kurdan be, yan jî çi dibe bila bibe wisa xuyaye ku kurd hînê amadekirina paşgoyan nebûne.
Di van paşgoyên ku rojnameyan Tirkiyeyê yên bi tirkî amade kirine de, paşgoya herî mezin a Vatan Kîtabê ye ku 120 rûpel girtiye. Piştî wê bi 100 rûpelî Radîkal Kîtab û dûre jî bi 96 rûpelî Milliyet Kîtab tê.
Di van paşgoyan de pirtûk dane nasîn, bi nivîskaran re hevpeyvîn hatine kirin, hilbijêreke ji lîsteya çalakî û rojên îmzeyan ên fûarê hatine pêşkêşkirin. Bi ser deh rojnameyan re ku paşgo amade kirine, her yekê li gor bîrdozî, yan jî nêzîktêdayîna xwe cih daye pirtûkan, naverok amade kirine. Mînak, paşgoyên rojnameyên olî zêdetir pirtûkên derdora xwe derxistine pêş, yên Kemalîstan li gor xwe, yên din jî li gor nêzîktêdayîna xwe. Lê yekê jî nûçeyeke li ser pirtûkên bi kurdî çênekirine. Paşgoyên wekî Radîkal Kîtap, Evrensel Kîtap û Bîrgun Kîtap ku carinan li ser pirtûkên kurdan tiştinan diweşînin (carinan bi kurdî) lê di van paşgoyan de tu nivîseke wisa neweşandine. Ji van hemû rojnameyan tenê Taraf Kîtapê cih daye du nivîsên bi kurdî ("Dayika Meryemê û Meryema Sebrî Silîvanî" - Ferzan Şêr û "'Û Gotina Min': Nameya Şêx Hat Xwendin" - Hamîd Omerî). Belê bi ser deh rojnameyan de, nêzî hezar rûpelî paşgo hatiye weşandin lê tenê du rûpel ji bo kurdî. Ev yek rewşa nêzîktêdayîna li hemberî kurdan û kurdî jî nîşan dide.

Vaye hin paşgoyên pirtûk û bi rêzê her yek çend rûpelî hatiye weşandin:

- Vatan Kîtap: 120 rûpel (8 rûpel ji bo paşgoya zarokan)
- Radikal Kitap: 100 rûpel
- Milliyet Kitap: 96 rûpel
- Taraf Kitap:64 rûpel
- Hurriyet Kitap: 46 rûpel
- Akşam Kitap: 46 rûpel
- Birgun Kitap: 40 rûpel
- Aydinlik Kitap: 32 rûpel
- HT Kitap: 32 rûpel
- Yurk Kitap: 32 rûpel
- Evrensel Kitap: 24 rûpel