Diyarname
Kovara bi navê “Soryaz” li Qamişloyê bi kurdî û erebî dest bi weşanê kir. Du birayên bi navê Dilşad û Hişyar Murad ev kovar derxistine. Soyraz, bi hejmara xwe ya yekê, wekî 195 rûpel gihîşt ber destên xwendevanan.

Kovar wekî demsalî wê derê û niha hejmara xwe ya yekê wekî "Bihar 2026" derxist. Di vê hejmarê de li ser Qamişloyê dosyayeke hatiye amadekirin. Ji bo sedsaliya damezrandina Qamişloyê, "paytexta herêma Cizîra Sûriyê", bi navê "Qamişlo/Qamişlî/Zalîn: Çîroka Sed Salî" hatiye amadekirin. Di dosyaya lêkolînî de li ser dîrok û rêwîtiya bajarek a sed salî hatiye sekinîn. Di dosyayê de ji dîrok, heta taxên wê, heta kesayetiyên bajêr cih digirin.

Di beşa "Lêkolîn" de sê mijar hene: M. Emîn Sadûn li ser “Pêwîstiya Rexneyê Di Pêşxistina Kurteçîrokê De”, Siltan Osman Eto li ser “Gava Ku Masî Tî Dibin.. Çi Ji Me Re Dibêje?” û Sewsen Şêx Bekir li ser  “'Sobarto'ya Helîm Yûsif” nivîsandiye.

Di kovarê de hevpeyvîn, nivîsên li ser kesayetiyan, nivîsên li ser çand û hunerê, li ser şanoyê, li ser sînemayê hatine weşandin.
Her wiha di vê hejmarê de çîrok û helbest hatine weşandin, hin danasîna pirtûkan jî cih girtiye.

Amadekarên kovarê li ser armanca kovarê wisa gotine, “Kovar di naveroka xwe de pirrengiya zimanî û çandî ya herêmî dide pêş tevî cudahiya nêrîn û ramanan. Kovar ji tundrewiyê dûr e bi hemû awayên xwe û bangên nefretê yên dijî çînên civakî red dike. Kovar hewil dide ku xwedî nirxekî wêjeyî çandî be û siyaseta weşandinê jî li ser pirsgirêk û mijarên wêjeyî û çandî yên di civakên herêmî de ye.”

Amadekaran gotiye rûpelên wan ji bo pênûsên ciwan û jinan kiriye û hemû berhemên wêjeyî û çandî ji aliyê nivîskarên afrîner ve di herdu cîhanên kurd-ereb de di nava xwe de hembêz dike.