Diyarname
Kampanyaya Gel a Parastina Navê Kobanî di rêzeçalakiyên ji bo "Navê Kobanî" de îro meşek li dar xist. 

Îro bi diruşma “Kobanî nasnameyeke ku nayê jêbirin û naveke ku hêjayî îspatkirina di belgeyên fermî de ye” xwepêşandaneke girseyî li dar ket.

Xwepêşandan ji Çerxerêya Aştî ber bi Qada Jina Azad a li naverasta Kobanî dest pê kir. Beşdaran pankartên “Ne Eyn El Ereb, erê Kobanî”, “Kobanî nasname ye, xeta sor e”, “Nav maf e, Kobanî mafekî dîrokî ye” hildan.

Li Qada Jina Azad li ser navên beşdarên kampanyayê û xelkê bajêr daxuyaniyî bi erebî û kurdî ji aliyê rojnameger Xezne Celal û welatî Şêx Nebî Hemê ve hat xwendin.
Di daxuyaniyê de wisa hat gotin:
- Kobanî ne tenê navekî bajêr e, lê nasname, dîrok, bîrdank û sembola cîhanî ya azadî û berxwedanê ye. Ev navê ku cîhan tev dizane û bi yek ji girîngtirîn serkeftinên mirovî li dijî terorîzmê ve hat girêdan ne hûrgiliyek zimanî ye lê beşek resen ji nasnameya bajêr û mîrasa wî ye.
- Divê navê Kobanî di tevahî belge, sicil û peyamên fermî yên hikumetê de were pejirandin, ji ber ku ev nav rastiyeke dîrokî û çandî ya bajêr hildigire û cihê xwe yê ku bi fedakariyên xelkê wê hat avakirin diparêze.
- Em tevahî şêweyên îxanetê û rêznegirtinê li dijî welatiyên Kobanî red dikin. Rûmeta hemwelatiyên bajêr ne mijara bazariyê ye, her êrîşek li ser wan êrîşa li dijî nirxên jiyana hevbeş û hurmetê ye.
-  Piştî 2014'an cîhanê bi rêya Kobanî Sûriye nas kir; dema ku Kobanî li dijî çeteyên DAIŞ'ê sekinî. Wê demê navê Kobanî bi wêrekî, berxwedanê û netesmîlbûyînê li seranserî cîhanê belav bû. Ev nav li ser asta cîhanê cihê rêzgirtinê ye, lê hikumeta nû vê rastiyê paşguh dike û îsrar dike ku navê Eyn El Ereb bi kar bîne.
-  Em bang li tevahî hêzên civakî, çandî û hiqûqî û welatiyên Sûriyeyê dikin ku rêzê ji nasnameya Kobanî re bigirin, rûmeta xelkê wê biparêzin.
- Aliyên siyasî belkî dikarin di belgeyên fermî de gotinan biguherînin, lê nikarin navê ku di wijdana mirovan de ye biguherin, nav bi xwînê hatin lêkirin bi biryaran nayên jêbirin.

Bajarê ku li seranserê cîhanê hemû kurd jêre "Kobanî" dibêjin, hikumeta demkî ya Sûriyeyê dixwaze biguherîne û wekî Eyn El Ereb bikar bîne.