Stenbol
Di Show TV de rêzefîlmekî bi navê "Muhteşem Yuzyil" ku li ser jiyana Kanûnî Siltan Silêmanê Osmanî ye ev demekê ye di rojevê de ye. Oldaran di destpêkê de reaksiyon nîşanî vê rêzefîlmê dan ku aliyên têkiliyên cinsî yên Kanûnî nîşan dide.
Li ser vê yekê gelek daxwaznameyên gilîkirinê ji RTUK'ê (Lijneya Bilind a Radyo û Televîzyonê) re şandin. RTUK'ê rêzefîlm hişyar kir.
Digel vê jî rêzefîlm weşana xwe didomîne û mirov dikare bibeje ji rexnekirina oldaran wêdetir rêzefîlm aliyên serketî yên Kanûnî nîşan dide, digel têkiliyên wî yên cinsî. Bi vê mirov dikare bigihîje vê encamê jî: Rêzefîlm bi awayekî dikare wekî propagandaya osmanî bê hesibandin.
Lê îro mijara me tişteke din e: Di beşa dawî ya rêzefîlm de karakterê ku Kanûnî Siltan Silêman dilîze peyva "Kurdistan" bikar neanî. Bi gotineke din di senaryoyê de hatibû sansurkirin û di rêzefîlm de peyva Kurdistan nehat bikaranîn.
Di rastiya dîrokî de Kanûnî Siltan Silêman di sala 1526'an de nameyeke ji Kralê Fransayê yê dîl Francois re dişîne û di nameyê de peyva Kurdistan jî bikar tîne. Nameya navborî di pirtûka Prof. Halil İnalcık a bi navê "Devlet-i 'Aliyye" de cih digire û di wir de navê gelek cihên wekî Kurdistan, Azarbaycan, Şam, Heleb, Misir û medîne. Ereb û Yemen bilêv dike û dibêje; "Ez ku padîşahê van deran im..." Lê di rêzefîlm de ev nav hatin bikaranîn, peyva "Kurdistan" hate sansurkirin.