Stenbol
Serokê Partiya Saadetê Mahmut Arikan li Girtîgeha Edîrneyê çû serdana siyasetmedar Selahattin Demirtaşî.

Arikanî piştî hevdîtinê daxuyaniyeke nivîskî belav kir û got k Tirkiye ji zimanê pevçûn û xirecirê aciz bûye, di siyasetê de pêdivî bi helwesteke çareseriyane heye. Arikan wiha dom kiriye, "Em wekî siyasetmedarên ku welat û pêşeroja me difikirin; gere em qada lihevkirinê ya ku edalet, erdem û diyalogê digire navenda xwe berfirehtir bikin. Tirkiye ji xirecirên rojane yên bê çareserî û zimanê pevçûnê aciz bûye. Îro ji her demê zêdetir pêdiviya me bi nêzikatiyeke çareseriyê ya bi erdem û dilpola heye."

Arikanî diyar kiriye ku ligel ku biryara dadgehê nîn e jî bi salan girtîmayîna kesan ne tenê baweriya bi edaletê xira dike, di heman demê de baweriya bi siyasetê jî têk dibe û ev yek gotiye, "Demirtaş ji sala 2016'an ve girtî ye. 22'yemîn Dadgeha Cezayê Giran a Enqereyê ku di gulana 2024'an de bi dawî bû di doza Kobanî de bi qasî 40 salan ceza da Demirtaşî. Lê Dadgeha Mafên Mirovan a Ewropayê li ser girtîmayîna Demirtaşî biryara binpêkirina mafê wî da."

Arikanî diyar kiriye ku ev hevdîtina însanî û siyasî di demên pêş de jî dê bidome.