Diyarname
Kovara Nûbiharê ku sê mehan carek derdikeve bi hejmara xwe ya 175’an li pêşberî xwendevanên xwe ye. Kovare vê carê meseleya “Kurdên Anatoliya Navîn” wekî dosya amade kiriye.
Kovara bi kurdî Nûbiharê hejmara xwe ya bihara 2026'an pêşkêş kir. Kovara ku her sê mehan carek derdikeve û di her hejmarê de dosyayeke taybet amade dike, di vê hejmarê de bi edîtoriya Mehtab Îdelî û Adem Ozgur dosyaya “Kurdên Anatoliya Navîn” amade kiriye.
Beşek ji kurdan bi sedan salan li Anatoliya Navîn a Tirkiyeyê dijîn. Li bajarên Tirkyeyê yên wekî Enqere, Konya, Kirşehir, Yozgat, Aksarayê û gelek bajarên din kurd dijîn. Ji bo van deran Anatoliya Navîn tê gotin. Jixwe ji ber vî navî gelek kurd hene dibêjin “Ez ji Anatoliya Navîn im”. Di dosyaya Nûbiharê de jî ev mesele ji aliyê dîrokî, ji aliyê ziman, edebiyat, folklor, muzîk, ji aliyê eşîr, kesayet û hin mijarên de nivîs hatine amadekirin û weşandin.
Gerînendeyê Giştî yê Weşanê yê Nûbiharê Suleyman Çevik di nivîsa xwe de dibêje: “Wisa xuya ye, kurdên Anatolya Navîn, wan bi xwe pir caran behsa xwe kirine, lê me nekiriye; me ev kurdên vê derê terkî qedera wan kirine. Ji ber vê sedemê ez pir kêfxweş im; belkî cara ewil li ser wan dosyeyek wisa amade dibe. Weşandina dosyeyek wiha dibe nesîbê Nûbiharê.”
Di çarçoveya dosyayê de Mehmet Bayrak nivîsa “Kurdên Anatoliya Navîn: Kêmneteweya di nav kêmneteweyan de” (werger: Arya Bilikan), Şoreş Reşî nivîsa “Dîroka Kurdên Anatoliya Navîn”, Ali Duran Topuz nivîsa “Barê Hespê Mîrê Qoçgîrî: Bîr û Bîra Hember a Şînê” nivîsiye. Yek ji edîtorên dosyayê Mehtab Îdelî ligel nivîsa “Çend Navdarên Kurdên Anatoliya Navîn”, nivîsa “Çend Gotinên Devokî yên Kurdên Anatoliya Navîn” jî amade kiriye û di dosyayê de cih girtiye.
Nivisa Mem Xelîkan a bi sernavê “Ji Kurd Remzî heta roja îro Muzîka Kurdî li Anatoliya Navîn” bi wergera Bamed Serdar di dosyayê de cih girtiye.
Li aliyê din yek ji edîtorên dosyayê Adem Ozgur liger weşanger Alî Çîftçî di vê çarçoveyê de hevpeyvînek kiriye. Çitfçi ku di heman demê de kovar Bîrnebûnê jî bi rê ve dibe, gotiye, “Bîranîn Xebateke Hebûnê ye!”
Ji bilî van nivîsên Kadîr Çelîk, Mûrad Ciwan, Mustafa Kizilkaya, Memê Mala Hine, Melik Ozkan, Rohat Alakom, Xizan Şîlan, Muzaffer Ozgur, Rojvan Enes, Nuh Ateş, Dîlan Şewqî, Yusuf Yeşiloz, Çavuş Yapici, Îmed Îdelî, Fikret Yildiz, Aşiq Şêxo, Dr. Haci Çevîk, Kadîr Çelîk, Xamgelî Bane, Osman Alabay, Azad Celikanî di kovarê de hatine weşandin.
Ji bo têkilî:
0212- 519 00 09
info@nubihar.com
**********
Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.