Diyarname
Sembola çepgiriya Amerîkaya latîn, Serokdewetê berê yê Uruguay Pepe Mujica îro mir. Mujica 90 salî bû.

Navê wî yê dirêj Josê Alberto Mujica Cordano bû, ew di sala 1935'an de li Montevîdeoya Ûrûgûay hatibû dinê. 

Pepe Mujica di salên 1960'an de li Tupamarosê gerîla bû. Di dema derbeyên leşkerî de, di navbera salên 1970-1980 de 12 salan li girtîgehê ma. 

Mujica endamê koalisyona Eniya Berfireh a ku ji partiyên çepgir pêkdihat, bû. Di navbera salên 2005-2008'an de Wezîrê Karên Sewalvanî, Çandinî û Masîvaniyê bû. Paşê bû Senator. Wekî endamê Eniya Berfireh di sala 2009'an de ket hilbijartinê û hat hilbijartin. Roja 1'ê adara 2010'an wekî Serokdewlet dest bi kar kir. Heta 2015'an Serokdewletê welat bû.

Meaşê wî 12 hezar dolar bû lê sedî 90'ê meaşê xwe diyarî saziyên xêrxaziyê kir û bi vê yekê wekî serokdewletê herî feqîr li dinyayê hat binavkirin.
Mujica di sala 2005'an de ligel Lucía Topolansky zewicî ku Topolansky jî wekî wî gerîlayeke berê bû, senator bû. Zarokên wan tune bûn, li gund, li maleke sade dijiyan.
Mujica bi jiyana xwe ya sade bala dinyayê kişandibû, wekî baweriya olî jî wî xwe wekî ataîst bi nav dikir.

Roja 9'ê rêbendana 2025'an di hevpeyvîna ku li kovara Busqueda belav bûbû de gotibû, "Ez bi qansêra roviyê ketime, ji wir ev bandor li pişika reş kiriye û piştî vê yekê min dest ji dermankirinê berda. Ger ez rastî bejim, ez dimirim û piştî ez bimirim, ez dixwazim li cem kûçikê xwe bême definkirin." Piştî vê hevpeyvînê bi 5 mehan roja 13'yê gulana 2025'an mir.