Mîrza RONΠ

Di van demên dawî de her ku diçe ji hêla şaredariyên AKP’ê û walîtî û qeymeqamiyan ve konserên hunermendên kurd tên qedexekirin. Hunermendên kurd stranên xwe kurdî dibêjin û li çanda kurdî xwedî derdikevin. Lê belê walîtî û qeymeqamî destûrê nadin stran û çanda kurdî di nav gel de bê guhdar kirin. Di van du salên dawî de bi dehan car bernameyên kurdî hatin qedexekirin. Ji hêlekî ve lîstikên şanoya kurdî tên qedexekirin û şanoger tên girtin. Ji hêlekî din ve konserên kurdî tên qedexekirin û hunermendên kurd tên girtin. 

Herî dawî Qeymeqamiya Tetwanê lîstika şanoyê “Hay lo Dîsa Tevlihev Bû” û Qeymeqameya Fatiha Stenbolê jî bernameya Navenda Çanda Mezopotamya qedexe kir. Bernameya NÇM’ê (NÇM) bi navê “Çîrokên Xorasanê” bû tê de dê çîrok bihata xwendin, konsertek biçûk bihata pêşkêş kirin. Di van salên dawî de her sal gelek konser, bernameyên kurdî, lîstikên şanoyê, rojname û pirtûkên kurdî hatine qedexekirin. Duh malpera me lîsteya lîstikên şanoyê bi kurdî yên hatine qedexekirin weşand, îro jî em lîsteya bernameyên çandî û konserên bi kurdî ku di van sê salên dawî de hatine qedexekirin belav dikin. Va ye ew lîste:

15.11.2021
Konsera Mem Ararat

Konsera Mem Ararat a li Navenda Çanda Neşat Ertaş a Keçîorena Enqereyê ji bo ku dê kurdî bistire peymana ligel salonê ji aliyê Şaredariya Akp’yî ya Keçîorenê ve, bi awayekî yek alî hat betal kirin û bi vî awayî konser hat qedexekirin. 

* 

15.05.2022
Konsera Aynur Dogan

Şaredarê Akp’yî konsera Aynur Dogan betal kir. Di 20’ê mehê de li Derînceya Kocaelî konsera Aynur Dogan hebû, lê şaredariya Derînce destûr neda konserê û qedexe kir. 

* 

26.5.2022

Konserên Mem Ararat û Aynur Dogan

Vê hefteyê du konser hatin qedexekirin.

Mem Ararat dê li 29’ê mehê li Merinosa Bursa’yê li Navenda Çanda Kongre ya Ataturk konserek bida, lê walîtiya Bursayê bername betal kir û biryara qedexeyê da. 

Aynur Dogan jî di çarçoveya tûrneyê de 31'ê mehê li Kultur Park Açikhava ya Bursayê konser bida walîtî qedexe kir.

* 

18.05.2022

Konsera Stêrka Kawa

Li Zanîngeha Eren a Bedlîsê di mihrîcana biharê de bernameya muzîkê ya koma Stêrka Kawa hebû, lê destûr nehat dayîn û bernameya wan hat betalkirin. 

* 

26.5.2022

Konsera Metîn-Kemal Kahraman

Konsera hunermend Metîn-Kemal Kahraman, roja 17 mehê dê li Muşê konserek lidar bixista, lê Walîtiya Mûşê konser qedexe kir.

* 

22.06.2022

Konsera Pervin Çakar

Hunermend Pervin Çakar bi peyamek got ku ji ber di repertuara wê de stranên bi kurdî hebûn, Zanîngeha Artuklu destûr nedaye ku li wir konserek pêşkêş bike.

* 

27.09.2022

Konsera Mem Ararat

Li gor bernameyê hunermend Mem Araratî roja 27'ê mehê wê Navenda Çanda Ataturkî a Yenîşehîra Mêrsînî konser bida lê Walîtiya Mêrsînî konser qedexe kir.

* 

10.09.2022

Konsera Xecê

Hunermend Xecê 4'ê meha dehan dê li Salona Zanîngeha Şirnexê konser bida lê Rektoriya Zanîngehê destûr neda konserê. Hunermend Xecê biryara qedexeyê ragihand. 

22.10.2022 
Konsera Mîkaîl Aslan û Cemîl Koçgirî

Walîtiya Dersimê destûr neda konsera Mîkaîl Aslan û Cemîl Koçgirî ya ku dê li meydana Seyt Riza bihata lidar xistin.

* 

17.12.2022

Bernameya Salvegera NÇM’ê

Bi rasthatina 31’emîn salvegera avakirina Navenda Çanda Mezopotamya (NÇM) re dê konserek li Kuçukçekmeca Stenbolê bihata lidar xistin. Konser ji aliyê Qeymeqamiya Kuçukçekmecê ve hat qedexekirin. Û hunermendên li ber salonê kom bûbûn hatin binçavkirin. 

13.01.2023

Konsera Kasim Taşdogan

Hunermend Kasim Taşdogan êvara 13'ê rêbendanê li Nisêbînê wê konsereke pêşkêş bikira lê ji ber tehdîda polîs û zabitayan konser tebal bû.

Li gorî van konser û bernameyên tên qedexekirin jî baş tê dîtin ku her sal bi dehan car bernameyên li ser zimanê kurdî tên qedexekirin û rastî astengiyên kêfî tên. 

***

Nûçeya Eleqedar:

- Lîstikên kurdî yên ku hatine qedexekirin