Amadekar Cemil Oguz

Herî dawî Qeymeqamiya Tetwanê lîstika ŞanoWan a bi navê "Hay Lo Dîsa Tevlihev Bû" qedexe kir. Di van salên dawî de qedexeyên li ser lîstikên şanoyê yên bi kurdî zêde dibe.

Li ser van qedexeyan li ser sê salên dawî me lîsteyeke amade kir. Di vê lîsteyê de tiştê herî balkêş lîstika "Hay Lo Dîsa Tevlihev Bû" ye. Ev lîstik par jî ji aliyê Qeymeqamiya Tetwanê ve hatibû qedexekirin, îsal jî hat qedexe kir.

Va ne di van salên dawî de lîstikên bi kurdî yên ku hatine qedexekirin:

*

13.10.2020 / STENBOL

Bêrû / NÇM

Şaredariya Bajarê Mezin a Stenbolê (ÎBB) lîstika "Bêrû" ya Navenda Çanda Mezopotamyayê (NÇM) girtibû nav bernameya xwe ya mehane. Ev yekem car bû ÎBB'yê lîstikeke NÇM'ê digirt nav bernameya xwe û lîstik dê li Sehneya Şaredariyê ya li Gazîosmanpaşaya bihata lîstin. Qeymeqamiya Gazîosmanpaşaya Stenbolê lîstik qedexe kir.

*

13.11.2020 / RIHA

Bêrû / NÇM

Lîstika NÇM'ê "Bêrû" li Rihayê jî hat qedexekirin. Lîstik wê li Salona Baroya Rihayê bihata lîstin lê walîtî lîstik wedexe kir.

*

15.11.2021 / STENBOL

Dawiya Dawî / Şanoya Bajêr a Amedê

Stand-upa bi navê "Dawiya Dawî" divê li Su Gosterî Merkezî ya li Fatiha Stenbolê bihata lîstin, lê Qeymeqamiya Fatihê qedexe danî ser stand-upê.

*

05.12.2021 / MÊRDÎN

Tartûffe / Şanoya Bajêr a Amedê

Lîstika "Tartuffe" ku dê li Mêrdînê bihata lîstin, Walîtiya Mêrdînê bi sedema "15 rojan qedexeya çalakiyan heye" destûr neda lîstikê.

* 

06.03.2022: / CIZÎR

Mem û Zîn / Şermola

Mem û Zîna ku bi şêweyeke nû li navenda xwe, li cihê ku Mem û Zîn jê derketine bihata lîstik, lê Qeymeqamiya Cizîrê got "Çênabe ku careke din Mem û Zîn ji gorê rabin". Biryara qedexeya ji bo lîstikê roja 6'ê adara 2022'yan hat dayîn ku lîstik wê 12'yê adarê bihata lîstin.

*

28.05.2022 / ÇAYIROVA

Don Kixot/ Şanoya Bajêr a Amedê

Lîstika Don Kixot divê 28'ê gulana 2022'yan li Navenda Çanda N. Erbakan a Şaredariya Çayirovaya Kocaeliyê bihata lîstin, lê roja 16'ê gulanê Şaredariya AKP'yî ya Çayirovayê destûr neda. Şaredarî wekî ku bêje "Çi karê Don Kîxot li vir heye" bêyî sedem nîşan bide lîstik qedexe kir. Lê ev jî balkêş e: Organîzatoran pêşî ligel salonê li hev kiribû, peyman jî girê dabû lê paşê şaredarî destûr neda.

*

27.05.2022 / TETWAN

- Haylo Dîsa Tevlihev Bû / ŞanoWan

Lîstika "Haylo Dîsa Tevlihev Bû" ya Teatra Mencel roja 19.06.2023'yan li Salona Şaredariya Tetwana bihata lîstin lê Qeymeqamiya Tetwanê ew qedexe kir. Lîstikvan û derhênerên lîstikê xemgîn bûn, lê wan nedizanî salek din jî dema serî lê bidin dê dîsa qedexe bê.

*

05.06.2022 / EDENE Û MÊRSÎN

- Tartuffe / Şanoya Bajêr a Amedê Amed

Lîstikvanên Şanoya Bajêr a Amedê derketibûn tûrneya Behra Spî. Li Edene û Mêrsînê dê lîstik bihata lîstin. Ligel Salonên Şaredariyên her du bajaran li hev kirin lê rayedarên şaredariyan Edeneyê bêyî ku hewce bike, yan jî rewşeke fermî ya bi vî rengî hebe ji bo destûra fermî berî wan da walîtî. Û jixwe li wir her tiştî dest pê kir. Walîtiya Edeneyê lîstik qedexe kir. Deng ji Walîtiya Mêrsînê nehat, lê ji bo lîstina lîstikê rojek mabû ji wir jî dengê qedexeyê hat.
Lîstika "Tartuffte" roja 5'ê pûşpera 2022'yan li Edeneyê, 6'ê pûşpera 2022'yan jî dê li Mêrsinê li Salonên Şaredariyan bihata lîstin.

*

19.06.2023 / TETWAN

- Haylo Dîsa Tevlihev Bû / ŞanoWan

Û 2023 û dîsa Tetwan. ŞanoWan ku par navê wê Teatra Mencel bû bi lîstika xwe "Haylo Dîsa Tevlihev Bû" li Tetwanê bû lê ji ber qedexeyê bi xemgînî vegeriyabûn mal. Careke din amade bûn ku roja 19.06.2023'yan li Salona Şaredariya Tetwana derkevin ser dikê, lê dîsa Qeymeqamiya Tetwanê û dîsa qedexe.

Çîroka salên dawî ya qedexeyên li ser şanoya bi kurdî bi vî rengî ye. He tenê lîstikên bi kurdî, çalakiyên din ên bi kurdî, konser jî têne qedexe kirin. Baş e di vî warê de rewş çi ye? Ew jî niha li ber amadebûnê ye...

**

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.

** 

- Mail: diyarname@diyarname.com