Diyarname

Lîstika Teatra Jiyana Nû (NÇM) "Bêrû" ku vê mehê di nav bernameya Çalakiyên Çandî ya Şaredariya Bajarê Mezin a Stenbolê de bihata lîstin lê Qeymeqamiya Gazîosmanpaşaya Stenbolê qedexe kir.

Lîstikê xelat girtibû

Teatra Jiyana Nû di bin banê NÇM'ê de karên xwe yên şanoyê didomîne. Lîstika wan a bi navê "Bêrû" sê sal berê derket ser dikê. 

Di sala 2018'an de, di Festîvala Şanoyê ya Moskovayê de lîstik wekî lîstika herî serketî hat hilbijartin û bi Xelata Sereke hat xelatkirin.

Paşê lîstik li gelek bajarên Ewropayê hat nîşandayîn. Û vê mehê di nav bernameya çandî ya Şaredariya Bajarê Mezin a Stenbolê de wekî lîstikeke bi kurdî dê derketa ser dikê. Lîstik divê îro li Sehneya Şanoyên Bajêr a li Gazîosmanpaşayê bihata lîstin. Lê Qeymeqamiya Qazîosmanpaşayê lîstik qedexe kir.

Qeymeqamî "ewlehî" wekî sedem nîşan da û ev biryar da, "Bêdem li cihên ser vekirî/girtî, li nav sînorên Gazîosmanpaşayê lîstina Bêrû hatiye qedexikirin."

Derhêner Karaman: Ji ber kurdî bû qedexe kirin

Derhênerê lîstikê Nazmî Karaman ji bo malpera me axivî û got ku em li ser sînorê ku êdî gotin xilas dibe, em nizanin çi bibêjin. Karaman dibêje ku ew îro çûn sehne saz kirin, ronahî û hemû amadehî kirin, lê bi biryara Qeymeqamiya Gazîosmanpaşayê polîs hatin qedexe kirin. Karaman wisa got: "Ev lîstika Dario Fo ye, heta niha li gelek welatên dinyayê hatiye lîstin. Ew hiqûqê dibêjin lê bi bêhiqûqî hate qedexekirin. Ev yek ji bo şanoger û ji bo kesên xebata çand û hunerê dikin biryareke xemgîn e. Yekem car di bin banê Şanoya Bajarê Mezin a Stenbolê de me yê bilîsta. Biryarek nehiqûqî ye, biryareke kêfî ye. Pêdiviya me bi piştgiriya raya giştî heye. Heta kengê dê ev qedexe bidomin. Li ser naveroka lîstikê jî tiştek nîn e. Hemû mesele zimanê lîstikê ye. Ji ber ku bi kurdî bû lîstika me hat qedexekirin. Li her derê gelek lîstik têne lîstin polîs naçin kûlîsên wan, ew nayên qedexekirin. Fikra min ew e, tenê ji ber ku zimanê lîstikê bi kurdî bû hat qedexekirin. Ziman ne kurdî ba dê nehata qedexekirin."

Karaman dibeje ku divê bi salan berê gere Şaredariya Bajêr sehne bida lîstikên kurdî, lê niha yekem car tiştek wisa çêbû û wisa dom kir: "Em di bin banê Şanoya Bajêr a Stenbolê de bûn, em mêvanê wan bûn. Divê ew jî îtîrazê bikin. Emê îtîrazê bikin, serîlêdanên xwe bikin. Em li benda 'hat qedexekirin û her tişt xilas' nasekinin. Ji aliyê hiqûqî de emê serîlêdanên xwe bikin. Ez hêvî dikim emê carek din li vê sehneyê derkevin pêşberî temaşevanan."

Bilêt hemû hatibûn firotin
Şanoya Bajêr a Şaredariya Bajarê Mezin a Stenbolê yekem car lîstikek bi kurdî girtibû nav bernameya xwe. Piştî dest bi firotina bilêtên lîstikê hatibûn kirin hemû bilêt di kurtedemê de hatibûn firotin ku ev yek ji bo lîstikek bi kurdî muhîm bû. 

Derhêner Nazmî Karaman di heman demê de wekî lîstikvan jî di lîstikê de cih digire.

KUNYE:

BÊRÛ

Tekst: Dario Fo

Derhêner: Nazmî Karaman

Werger: Dilawer Zeraq

Lîstikvan: Rûgeş Kirici, Omer Şahin, Rewşan Apaydin, Cîhad Ekîncî

Du perde 

**

Nûçeyên eleqedar:
- Şanoyên Bajêr ên Stenbolê yekem car cih da şanoyeke bi kurdî

- 'Bêrû' li Moskovayê bi Xelata Mezin hat xelatkirin 

- Dario Fo li Berlînê bi kurdî deng kir

- Di du saliya xwe de BÊRÛ

-