Diyarname - Nûçe-Analîz
Kurê Musa Anter, Anter Anter ku kurtedemek berê bi destûra taybet a Serokwezîrê Tirkiyeyê Recep Tayyip Erdogan karî were Tirkiyeyê, niha dê hemwelatiya wî bi paş ve bidin wî. Li aliyê din der barê pirtûka bavê wî Musa Anter de jî lêpirsîn vebûbû. Lê di meseleyê de nakokî hene.
Kurê Musa Anter (bi gotina kurdan Apê Mûsa) Dîcle Anter li Şaredariya Batmanê ya BDP'ê di beşa çandê de dixebite.
Kurê Apê Mûsa yê din Anter Anter jî li Swêdê dijî.
Anter Anter di sala 1969'an de ji Tirkiyeyê veqetiyaye, di sala 1972'yan de ji hemwelatîbûna Tirkiyeyê hatiye avêtin. Di sala 1991'ê de jî ketina wî ya welat hatiye qedexekirin.
Anter Anter di 9.12.2011'an de nameyeke ji Serokwezîrê Tirkiyeyê Erdogan re şandiye û gotiye: "Ji bo ez li ser gora bavê xwe fatîhayeke bixwînim destûrê bidin min. Ez ketime 67 saliya xwe, min gora bavê xwe nedîtiye."
Anter Anter hemwelatiyê Swêdê ye. Kesek hemwelatiyê welatek be dikare bi rehetî wekî tûrîstekî here her welatî ku ne hewceye ji serokwezîrê/a wî welatî destûrê bixwaze. Ev yek ji bo Anter Anter jî derbas dibe. Yanê Anter Anter bêyî destûrê bixwaze jî dikaribû were Tirkiyeyê. Lê mesele ketina rojevê, yan tişteke din be em wê nizanin.
Her wiha em bibêjin hemwelatiyê Tirkiyeyê ba jî bi ser çûyîna wî re 43 sal derbas bûne û dozek heba jî heta niha gelek zagon guherîne û ew doz jî miheqeq ketiye. Di vir de divê parêzerên wî bizanibin rewş çi ye. Anter Anter heta niha ji ber ne di nav siyaseteke çalak de bû jî divê dozek derbarê wî de nîn ba jî.
Li aliyê din Cîgirê Serokê Giştî yê Ak Partî Huseyin Çelik got ku ewê hemwelatiya Anter Anter bi paş ve bidin wî. Ev gavek rast e lê AK Partî ne bi xêra xwe vê dide. Bi hezaran kesên piştî derbeya 12'yê Rezbera 1980'ê ji hemwelatîbûnê hatibûn avêtin, hemwelatîbûna wan di salên 90'î de paş ve dan wan. Yanê ev yek ji bo Anter Anter jî derbas dibe.
Ev jî aliyekê lê çend roj berê pirtûka Musa Anter jî têde der barê 10 pirtûkên ku Weşanên Aramê weşandin de lêpirsîn hate vekirin. Rast e, ev der Tirkiye ye, bi nakokiyên xwe jî, bi guherîn û neguherînên xwe jî.