Diyarname
'Festîvala Fîlman a Kîjan Mafên Mirovan?' îsal 9'emîn car li dar dikeve. Festîvala ku dê di navbera 13-17'ê mehê li dar bikeve de îsal pirsa "Mala me li ku ye?" tê pirsîn. Amadekarên festîvalê ji b.er 100'emîn Deklarasyona Balfour beşa Filistînê jî lê kirine û di vê beşê de dê fîlmên Filistînê bêne nîşandayîn.
Di bin beşên wekî "Mafên Hawirê", "Tirkiye Ber Bi Ku Ve?", "Mafên Jinan", "Fîlmên Queer" de fîlm dê bêne nîşandayîn.

Di 5 rojên festîvalê de nêzî 40 fîlmên li ser mafên mirovan bê pere dê bêne nîşandayîn. Ligel nîşandayîna fîlman li ser meseleyên rojevê forûmek û hin gotûbêj jî têne li dar xistin. Li Stenbolê li çar cihan fîlman têne nîşandayîn û heman demê de beşek ji van fîlman li Amed û Wanê jî têne nîşandayîn.
Di festîvala ku ji aliyê koma Documentarist ve tê organîzekirin de gelek fîlmên cur bi cur hene. Fîlmê "Taste of Cement" (Derhêner Ziad Khaltoum) li ser karkerên Sûriyeyê yên li Beyrûtê dixebitin heye ku li gelek festîvalan xelat girtiye. Fîlmê "Geographies" (Derhêner Chaghig Arzoumanian) jî çîroka malbateke ermen a li Lubnanê û ehta Tirkiyeyê pêşkêş dike.

Fîlmên derhênerên kurd
Di çarçoveya festîvalê de hin fîlmên derhênerên kurd jî cih girtine. Belgefîlmê "Radyo Kobanî" yê derhêner Rêber Doskî û "Zer" ê derhêner Kazim Oz tê nîşandayîn. Her wiha "Newhere to Hide" yê derhêner Zerdeşt Ahmed jî tê nîşandayîn. Derhêner Ahmed ku ji Silêmanî ye bi vî fîlmê xwe gelek xelat girtine.

Tirkiye ber bi ku ve?
Ji Tirkiyeyê jî hin fîlm û belgefîlmên mohra xwe li rojevê didin hene: “Uçurumun Kiyisinda Turkiye” (Derhêner İmre Azem), “Bir Şehrin KHK’si” (Ozen Meral Uç), “Hakikatin Gucu” (Xebata Kolektîf a Meclisa Jinan a KESK Haber-Sen û Jinên KESK'ê yên Stenbolê), “Elif” (Emre Kanlioglu, Elif Ergezen), “50/D’yi Bal Eyledik” (A. Deniz Morva Kablamaci), “Donuş” (Valeria Mazzucchi).

Cihê temaşekirinê
Fîlmên festîvalê li Stenbolê li  Aynali Geçit, Bitiyatro, Mezopotamya Sinema û Tutun Deposu ya Beyogluyê bê pere têne nîşandayîn.

Nîşandayînên li Amed û Wanê
Festîval di heman demê de di navbera 15-17'ê mehê li Amedê li dar dikeve. Li vir bi piştgiriya ÎHD'ya (Komeleya Mafên Mirovan) Amedê li dar dikeve. Di navbera 23-24'ê mehê de jî li Wanê derdikeve pêşberî temaşevanan.

Ji bo agahiyên zêdetir: www.hihff.org