Diyarname
24'emîn Festîvala Mûnzûrê îro dest pê kir û heta 2'yê meha pêşiya me dê bidome. Çalakî ligel navenda Dêrsimê li hin navçeyên wê jî hene. Festîvalê bi meşa ku ji ber Qada Seyîd Riza dest pê kir, start da

Festîvala Çand û Xwezayê ya Munzurê îsal bi diruşma ‘Ji bo Bîrê û Jiyana Azad Em Xwedî li Xweza, Ziman, Çand û Baweriya Xwe Derdikevin’ tê lidarxistin. Bi beşdariya nûnerên partiyên siyasî û saziyên civakî yên li bajêr, ligel gelek kesên ku ji gelek bajarên Kurdistan û Tirkiyeyê hatibûn, ji Kolana Hunerê ber bi Qada Sêyid Riza ve meşiyan. Beşdarên saziyan bi diruşmên "Dêrsim rûmet e, xwedî li rûmeta xwe derkeve", "Mûnzûr wê azad biherike", "Gulistan Doku li ku ye?" û "Festîval a gel e, nayê astangkirin" hatin bilindkirin.

Li ser navê Komîteya Amadekar a Festîvalê Umît Karabulut axivî: “Wekî berî 26 salan, em îro dîsa hatin cem hev. Wê demê Dêrsim ji her alî ve di nav agir de bû. Ji ber vê yekê, li hember vê polîtîkayê festîval hat destpêkirin. Ji wê rojê heta îro pirsgirêk neqediyan. Dêrsim dîsa ji her alî ve di bin zilmê de ye. Festîvala Mûnzûrê ew e ku di nav vê de dîrok, bawerî û çand xwe ji nû ve ava bike. Heke em werin gel hev em ê bihêz bin. Nexwe em ê parçe bibin.”

Ji Federasyona Yekîtiyên Dersîmê yên Ewropayê (ADBF) Alî Tacar ji wisa got: “Festîval encama berhevkirineke dîrokî ye û wekî pêdiviyeke girseyî derket holê. Festîval ne tenê şahiyek e. Dibêjin festîval siyasi bûye. Parastina çand, ziman û baweriya me siyasetek e. Em ê rê nedin ku komeke biçûk festîvala me xira bike.”

Mebûsa DEM Partiyê ya Dersîmê Ayten Kordu jî got: “Ev erdnîgarî bi têkoşîn û kedeke mezin hat honandin. Dêrsimê ji bo hemû gelan têkoşîna azadî û wekheviyê da ye. Kayûmê wê demê Tuncay Sonel li van axan jineke kurd winda kir. Gulistan Doku encama politîkaya ‘bêgorhiştinê’ ye. Ji bo hemû jinên hatine windakirin û qetilkirin em ê têkoşîna xwe bidomînin. Em dibînin ku tiştên ku Sonel li vir bi bikaranîna desthilata xwe kirine, nîşan didin ku polîtîkaya şerê taybet bi awayekî herî kûr berdewam dike. Li ser vê erdnîgariya qedîm, her dem êrîş çêbûn, lê Dêrsimê her dem bi hev re bûn. Ji bo eşkerebûna rastiyan, li erdnîgariya me pêdîvî bi hevrûbûnê heye. Li dijî polîtîkaya ‘bêgorhiştinê’ em daxwaza avakirina komîsyona heqîqetê dikin. Li ser rêyan, li cihên me yên pîroz kontrola nasnameyan tê kirin. Em dipirsin; hûn rêzê li kîjan heqîqetê digirin? Pêvajoyek hate ragihandin. Em ê aştiyê bi têkoşîna xwe pêk bînin.”

Piştî axaftinan govend hat gerandin û festîvalê bi awayekî fermî dest pê kir.

**

Nûçeya Eleqedar:

- Bernameya Festîvala Mûnzûrê eşkere bû