Diyarname
Di vê 29'ê mehê de dê rêveberên herêmî bêne hilbijartin. Vaye bi hejmara hilbijartina 29'ê Adarê:

- Kesên bêne hilbijartin dê pênc salan li ser kar bimînin.

- Bi temamî 48 mîlyon û 5 hezar û 650 kes dê dengên (rey) xwe bikar bînin.

- Hilbijêr dê biçin cem 177 hezar û 50 sindoqî û dengê xwe bikar bînin.

- Li bajarên wekî Semsûr, Agirî, Artvîn, Çewlig, Bedlîs, Amed, Elezîz, Erzîncan, Erzerom, Entab, Gîresun, Gumuşhane, Culemêrg, Qers, Meletî, Meraş, Mêrdîn, Mûş, Ordu, Rîze, Sêrt, Sêwas, Trabzon, Dêrsim, Riha, Wan, Bayburt, Batman, Şirnex, Erdexan, Îdir û Kîlîstê dê saet 07'an de dest bi dengdayînê bê kirin û di 16'an de bi dawî bibe.
Li bajarên wedin jî dengdayîn dê 08'an de dest pê bike û di 17'an de bi dawî bibe.

- Hilbijêrên ku li bajarên mezin dijîn dê ji bo şeradariya bajarê mezin, encumeniya giştî ya bajêr, şaredartiya navçeyê, encumeniya meclisa şaredariyê û ji bo hilbijartina moxtaran dengên xwe bikar bînin.

- Kesên li bajêr, navçe û bajarokan dijîn dê ji bo encumeniya giştî ya bajêr, şaredarî, endamtiya meclisê û moxtaran dengên xwe bikar bînin.
Kesên li gundan dijîn jî dê tenê ji bo encumeniya giştî ya bajêr û moxtarên gund herin cem sindoqê û dengên xwe bidin wan.

- Di nav berendaman de dê 16 kes ji bo Şaredariya Bajarê Mezin, 65 Şaredarên Bajêr, 892 Şaredarên Navçeyan, hezar û 974 kes ji bo Şaredariya Bajarokan û her wiha 52 hezar û 765 kes jî dê ji bo moxtariyên tax û gundan bêne hilbijartin.

- 3 hezar û 284 kes ji bo encumeniya giştî ya bajêr, 33 hezar û 868 kes ji bo encumeniya meclisa şaredariyê (ji bo navçe û bajarokan) dê bêne hilbijartin.

- Her kes li cem sindoqa ku hatiye diyarkirin dê bi nasnameyên xwe ku li ser nimreya Komara Tirkiyeyê nivîsandiye dengên xwe bikar bînin. Kesên girtî jî li girtîgehan.

- Di hilbijartinê de çar pisûla hene. Ji wan ya bi rengê tûrûncî ji bo encumeniya giştî ya bajêr, ya bi rengî hêşîn ji bo şaredariyê, ya bi rengê zer ji bo encumeniya meclisa şaredariyê, ya bi rengê sipî jî ji bo şaredariya bajarê mezin dê bê bikaranîn.
Pisûlaya tûrûncî dê bixin zerfê bi rengê tûrûncî; pisûlaya bi rengê hêşîn û ya bi rengê zer dê bi hev re bixin nav zerfê hêşîn.
Li bajarên mezin pisûla bi rengê sipî jî dê bixin zerfê bi rengê hêşîn.
Li Tirkiyeyê û bajarên kurdan li van bajarên ji bo Şaredariya Bajarê Mezin deng dê bê bikaranîn: Edene, Enqere, Antalya, Bursa, Amed, Erzerum, Eskişehir, Enteb, Mêrsîn, Stenbol, Îzmîr, Kayseri, Kocaeli, Konya, Sakarya û Samsun

- Di hilbijartinê de 19 partî hene û rêza wan a di pisûlayê de wisa ye: ANAP, MHP, LDP, DSP, DTP, ÎP, CHP, HAK-Par, BBP, BDP,  MP, ODP, TKP, DP, SP, AKP, BTP, EMEP, HYP.

- Ji serê sibê heta saet 18.00'an weşandina nûçeyeke li ser encam an nirxandina li ser hilbijartinê qedexe ye. Tenê di radyoyan de agahiyên ku YSK'ê (Lijneya Bilind a Hilbijartinê) eşkere kirine dê bêne weşandin. Qedexeyên weşandina agahî, encam û nirxandinên li ser hilbijartinê di saet 21'ê de radibin. Lê YSK guncav bibîne dikare berî vê saetê jî biryara rakirina qedexeyê bire.

- Ji serê sibê saet 06'an heta şev saet 24.00'ê ji bilî peywirdarên ewlekariyê bi xwe re gerandina her cure çek û abûrên teqîner, amûrên wekî kêr û cureyên bi vî rengî qedexe ye. Her wiha çekên biyolojîk, kîmyewî, nukleer û radyoaktîf jî.