Enqere
Hevserokê HDP'ê Selahattin Demirtaş îro li Enqereyê hem çû cihê bûyê ji bo bîranîna kesên jiyana xwe ji dest dan, paşê beşdarî meşa li Sihiyeyê bû û dûre çû Edlî Tibê. Demirtaş hem êşa malbatan parve kir, hem ji rayedaran agahî girt.
Li van deran Demîrtaş li ser meseleyê axivî. Vane hin gotinên wî:
- Duh li vê meydanê hemwelatiyên xweşik ên vî welatî, kurt, tirk, ereb, çerkez, ermen, sunnî, elewî, êdîzî lê di dilê her yekî de strana aştiyê dê heba. Dihatin vê qadê wêneyek wisa, tabloyek wisa çêbikin. Tiştê ku dîktator jê ditirsiyan wan dikir. Dixwestin yekîtiya gelan, hêza yên tên çewsandin li Sihhiyeyê nîşan bidin. Vaye faşîzm ji vê ditirsiya. Emê bi israr, bi inyad vê yekê bidomînin. Em yên têne çewsandin emê li gel hev bisenin, bi israr azadiyê bixwazin, emê bibêjin berxwedan.
- Dilê me diêşe. Heta niha me 128 hevrêyên xwe winda kirin. Em cenazeyên xwe dişînin bêdawîbûnê. Li her demê em dixwazin bi sedhezaran pêşwazî li van hevrêyên me bikin.
- Roj dê bê, dewran dê biguhere, yên ku dibêjin 'dewlet malê me ye' dê hesabê bidin.
Çivîkek li Enqereyê bifire hay jê çêdibe lê...
- Dewleta ku li Enqereyê çivîkek bifire hay jê çêdibe, vê dewletê pêşî li vê komkujiyê negirtiye. Eynî wekî Amedê, wekî Pirsûsê..
- Duh Serokwezîr nîv saet diaxive, bîst deqeyên wê ji bo me vediqetîne, me sûcdar dike. Alîgirên wî, şêlaf televîzyon bi televîzyon digerin û yên hatine kuştin wan sûcdar dikin, me sûcdar dikin.
- Me dixwest herî hindik di êşê de bên gel hev, lê em çawa ligel qatilên xwe bên ba hev. Em çawa ligel yên me qetil dikin, yên li ser vê dikenin bên ba hev. Ligel faşîzmê çawa em bên ba hev. Mirovên ku qiçekî mirovahî di dilê wan de heye jixwe hatine ba hev.
Emê hesabê bipirsin
- Emê bibêjin ev dewlet dewleta me ye, ev welat welatê me yê hevpar e. Emê destûrê nedin hin bi jor de bên û dest bidin ser mafên me. Emê bibêjin em bi hev re lingên xwe li erdê bixin dê camên Qesrê bişkên. Emê bi tolê, bi kînê tevnegerin. Lê emê hesabê vê bipirsin. Gava yekemîn a vê yekê 1'ê sermawezê ye.
Roj bê dê hesab bê pirsîn
- Berpirsiyarê hemû kuştinên nediyar dewlet e. Ger ronî neke wê demê kujer dewlet e. Niha berpirsiyarê vê komkujiyê dewlet û hikumet e. Berpirsiyarê komkujiya Amedê jî û Enqereyê jî dewlet e. Dê roj bê bi rêya hiqûq hesab ji berpirsiyaran bê pirsîn. Roja hesab ji wan bê pirsin li Tirkiyeyê dê jiyan çêbibe.
Bêheya nebin dê îstîfa bikin
- Aştî dema ku her kes bi hev re bikene û her kes bi hev re bigirî pêk tê. Biratî jî bi heman rengî ye. Kesên duh li vir bûn ji bo aştiyê li vir bûn. Partiya me jî ji bo piştgiriyê li gel wan bû. Serokwezîr her çend bêje 'Piştgiriyê bidin kijan partiyê bila bidin dilê me şewitî' jî derewan dike. Dirûtiyan dike. Duh mîtînga partiya me tune bû. Rêveberên dehan partiyan li qada mîtîngê bûn. Hemûyan digot bila xwîn raweste kuştin bikekine. Digotin bila biratî aştî bê vî welatî û azadî pêş bikeve. Ji her derên Tirkiyeyê mirov hatin vir. Bila Serokwezîrê ketî ji kerema xwe re bihata vir. Lê Serokwezîr bi vê gotina 'Ez xemgîm bûm' neheqiyê dike. Yên hêsiran dibarînin jî em in. Yên rastî neheqiyê tên jî em in. Ji ber ew qas bê heya ne îstîfayê jî nakin. Li şûna îstîfa bikin derdikevin pêşberî kamerayan û dikenin. Ev kes nabin nûner û wezîrên me. Ew ne wezîrên me ne.
Çima gaz û av bi ser mirovan de diavêtin?
- Bila Serokwezîrê demî rabe daxuyaniyê bide. We çima piştî teqînê bombeya gazê avêt. Polîsan çima gaz avêt. TOMA çima av avêt. Bedenên mirovan parçe bûne, lê hûn bombeyên gazê û ava şid davêjin. Li şûna hûn lêborînê bixwazin hûn qerfê xwe dikin."
**
Nûçeya eleqedar:
- Bi hezaran kes li Sihiyeyê kom bû