ŞIRNEX
412 rêxistinên sivîl ên herêmê balkişand ser komkujiyên çeteyên DAIŞ'ê û diyar kirin ku divê demildest Konferansa Neteweyî ya Kurdistanê kom bibe.
412 rêxistinên sivîl ên 24 bajarên Kurdistanê li malên AFAD'ê yên welatiyên êzdî yên Sîlopiyê daxuyanî dan çapemeniyê. Di daxuyaniyê de pankratên "Şengal dil e, Kurdistan bê dil nabe!" û "Xwedîlêderketina Rojava, Şengal û Mexmûrê xwedîlêderketina nirxên mirovahiyê ye" hate vekirin. Li ser navê saziyên sivîl Hevserokê Şaxa SES'ê yê Amedê Ramazan Kaval daxuyanî xwend û diyar kir ku xirîstiyan, sunnî, êzdî, mislimanên şiî û nusayrî û gelek komên din ên olan di bin gevên çeteyên DAIŞ'ê de ne û wiha got: "Di komkujiya Şengalê de bi hezaran jinên kurdên êzdî hatin qetilkirin. Ji ber tîbûnê bi sedan jin, zarok û extiyaran jiyana xwe ji dest dan. Her diçe ji ber birçîbûn û tîbûnê hejmara kesên dimirin zêde dibin."
Kaval, anî ziman ku divê demildest Konferansa Neteweyî ya Kurdistanê kom bibe û wiha axivî: "Divê ji bo hemû gelên li Kurdistanê dijîn mekanîzmaya parastinê bê avakirin."
DÎHA
**
