Diyarname
Komeleya Nivîskarên Kurd a Amedê ji bo Roja Zimanê Zikmakî daxuyaniyeke nivîskî weşand.

Vaye daxuyaniya Komeleyê:

Ji bo raya giştî

Di vê roja navneteweyî, roja zimanê zikmakî de, ku li sarenserê cîhanê li tevî UNESCO’yê her kom, her dewlet, her netew wê wekî roja cejna zimanê xwe pêşwazî dike û bi çalakiyên cihêreng yad û pîroz dike de; gelê kurd, gelê mîratxurê 33 şaristiyên li ser axa Mezopotamyayê şop û dewsên xwe hiştî; di nava sînorê Tirkiyeyê de, li Îran û li Sûriyeyê hê jî ji vî mafê xwe yê ku nebe nabe, mafê rewa û sirûştî; ji perwerdeya bi zimanê zikmakî bêsûd û bêpahr e.

Ev bêpahrî diyar e, ku encama serencama polîtika û siyaseta bişavtker a ku 80 sal in bi destê dewletê bi hişmendiya ‘ yek ziman, yek netew, yek al’ tê mêşandin e.

Di gel feraset û siyaseta mandelker, û li gel siyaseta qirker û tuneker a dewletê; gelé kurd ji dem û serdemên herî teng û tarî, ziman û çand û wêjeya xwe ya devkî û nivîskî parast, pêş xist û gihande îro.

Di vê roja eyan, di vê roja ku her roj ji 6000 zimanên heyî zimanek winda dibe de, Komeleya Nivîskarên Kurd bangî rêveber û rayedarên dewletan dike, ku di zûtirîn demê de, wekî dewletên hemdemî tevbigerin; ji dibistana seretayî heta bigihe zanîngehê mafê perwerdeya bi zimanê kurdî bixin bin nîrê zagonî û vî mafê bingehîn ê şertê bi hev re jiyînê, di makazagonê de cî bi cî bikin.

Li hêla din, Komeleya Nivîskarên Kurd bang li serwerên siyasî û civakî, û kesayetên navdar ên kurd, û sazî û dezgehên siyasî-civakî dike, ku zimanê kurdî di her qadê de bikar bînin, lê xwedî derkevin, dara jiyînê bi qelemê zimanê kurdî bitahmînin…

Em dibêjin jiyan bi kurdî xweş e!
Em dibêjin ken bi kurdî xweş e!
Em dibêjin her mirov bi zimanê dayika xwe rûgeş e!

20.02.2010
Komeleya Nivîskarên Kurd

***

Nûçeyên eleqedar:

- Hevserokên BDP’ê ji bo Roja Ziman bang li hikumetê kir

- Li Amed, Batman û Stenbolê çalakiya Roja Ziman

- Li Sêrtê ji bo Roja Zimanê Zikmakî panelek li dar dikeve

- Di roja Zimamê Zikmakî de çalakiyên li ser ziman

- Ji Kurdî Derê gaveke din: Afîşên alfabeya kurdî 

-