Li gorî rêziknameyên Wezareta Rêveberiya Herêmî, parêzgar berpirsê herî payebilind ê parêzgehê ye, lê di demên dawîn de çend bûyer û çalakiyên fermî çêbûn bêyî ku parêzgarê Hesekê Nûredîn Ehmed beşdar bibe.

Yek ji van bûyer û çalakiyan, vekirina Deriyê Sînor ê Til Koçerê bû. Beşdarnebûna parêzgar, pirsên li ser sedem û bandorên wê derxistine holê, bi taybet ji ber ku deriyê sînor di nav sînorên îdarî yên parêzgehê de ye.

Her wiha li gorî hin dîmenên ku ji hêla ajansa nûçeyan SANA ve hatine weşandin, der barê vegera koçberên Serêkaniyê û xebitandina stasyona Elok a avê de, hevdîtin û çalakî li Serêkaniyê pêk hatine, lê parêzgar beşdar nebûye. Her wiha tu nîşaneyên hevkariya rasterast bi saziyên têkildar re, bi taybet ên berpirsyarên xizmetên avê ku di nav saziyên dewletê de hatine entegrekirin, tune bû. Vê yekê pirsên li ser awayê rêveberina van mijaran derxistine holê.

Li gorî yasayên Sûriyeyê parêzgarê Hesekê rayedarê herî payebilind ê herêmê ye û di minasebetên girîng de cih digire, anku divê parêzgar beşdarê sereke yê çalakiyên fermî yên ku li parêzgeha wî têne lidarxistin be û divê di mijarên îdarî, xizmetguzarî, bi taybetî yên têkildarî deriyên sînor, projeyên stratejîk an peymanên herêmî de agahdar û beşdar be.

Têkildarî mijarê û sedemên nebeşdariya parêzgar di van bûyer û çalakiyan de, me hewl da hin agahiyan ji parêzgariyê wergirin, lê me tu bersiv wernegirtin.

Not: Me ji Ajansa Hawarê hatiye girtiye û bêyî dest bidin me belav kir.