Amed
Hevşaredara Peyasa Amedê Bêrîvan Gulşen Sîncar û heyeta pê re, di çarçoveya rêzehevdîtinên fermî de li Swêdê serdana rêveberên Navenda Pirzimanî ya Şaredariya Vesterasê kirin.

Perwerdeya bi 48 Zimanên Cuda
Di serdanê de hat ragihandin ku li vê navenda navneteweyî, 4500 xwendekar bi 48 zimanên cuda perwerdeyê dibînin. Hat diyarkirin ku di navendê de 160 mamoste wezifedar in û dersên bi zimanên kurdî û erebî didin. Bi taybetî bal kişandin ser perwerdeya zimanê dayikê ku ji pêşdibistanê heta lîseyê, bi destê 18 mamosteyên kurd, perwerdeya zimanê kurdî pêşkêşî 800 xwendekaran tê kirin.

Agahiyên li Ser Modelên Perwerdeyê
Berpirsiyara navendê Liselotte Dahlberg-Jakobsson û cîgirên wê Sari û Asa Ewertson, li ser xebatên navendê û modelên perwerdeyê agahiyên berfireh dan heyeta Şaredariya Peyasê. Di hevdîtinê de nivîskar Haydar Diljen û Mahmûd Lewendî jî amade bûn û li ser hûrguliyên xebatên li navendê û girîngiya mînakên serkeftî yên perwerdeya kurdî zanyarî parve kirin.

Çavdêrî ji bo "Zarokistanan"
Hevşaredar Sîncar û heyeta pê re, piştî civînê serdana polên perwerdeya kurdî kirin û ji nêz ve çavdêriya pêvajoya hînbûna xwendekarên kurd (pêşdibistan, dibistana navîn û amadehiyê) kirin.
Hat destnîşankirin ku tecrubeyên li vê navendê hatine bidestxistin, dê ji bo rêveberiyên herêmî û bi taybetî ji bo Zarokistan û navendên lênihêrîna zarokan ên Şaredariya Peyasê bibin mînak û çavkaniyeke girîng a zanistî.