Diyarname
Mebûsa DEM Partî ya Bedlîsê Semra Çaglar Gokalp ji mebûsa berê ya AKP'ê Gulşen Orhan pirsî, "Çima deriyê 'Koleksiyona Şarkiyat'ê ku têde 130 berhemên kurdî hene venakin?"

Mesele ji vir derket: Wezareta Çandê ya Tirkiyeyê Koleksiyona Aleksandre Jaba bi hevkariya Beşa Çand û Zimanê Kurdî ya Zanîngeha Artûklû çap kir. Mebûsa berê ya AKP'ê ya Wanê Gulşen Orhan wêneyê xwe ku têde ligel Serokê AKP'ê û Serokomarê Tirkiyeyê Recep Tayyip Erdogan e, belav kir. Orhan di peyama li ser X'ê belav kir de pesnê vê xebatê da û got, "Di koleksiyona 15 cîldî de 39 berhemên cuda, 69 destxest hene."

Li ser vê yekê Mebûsa DEM Partî ya Bedlîsê Semra Çaglar Gokalp ev parvekirina Orhan etiket kir û wisa got, "Birêz Gulşen Orhan em vê xebata we bi qîmet dibînin. Lê li vir dixwazim balê bikişînim ser nakokiyek. Arşîva Berhemên Nivîskî ya Pirtûkxaneya Suleymaniyeyê di bin destê desthilatdariya we de ye. Di vir de 'Koleksiyona Şarkiyatê' heye ku 195 berhem jê hatine katalogkirin. Nêzî 130 hebê van berheman koleksiyona berhemên bi kurdî ne. Ev demek dirêj e Serokatiya Lijneya Berhemên Nivîskî ya Tirkiyeyê nahêle kes xwe bigihîne van berheman. Her wiha ne tenê ev koleksiyon; destûr nade kes xwe bigihîne koleksiyonên din jî; ku tê gotin di vir de dor 300-400 berhemên bi kurdî hene. Bi awayekî eşkere ev yek nîşan dide ku astengî li pêşiya dîtina berhemên mîrateya kurdî datînin."

Mebûsa DEM Partî Gokalp gotiye, "Berhemên Feqiyê Teyran, Ehmedê Xanî, Melayê Cizîrî, Melayê Bateyî, Zahid Zeherî, Mihemed Cewad Sîyahpûş û yên gelek şexsiyetên kurdan di arşîvan de têne veşartin" û wisa gotiye, "Birêz Orhan ev berhemên niwaze yên kurdî ku di arşîvan de têne rawestandin dê çawa bin? Ev du meh in li ser vê mijarê me pirsiyarname daye Wezareta Çand û Tûrîzmê ya Tirkiyeyê lê hê jî bersiv nedane. Berî berhemên li ser ziman û çanda kurdî yên li welatên din, divê deriyê berhemên di arşîva welat de ne bêne vekirin."