ENQERE

Hevserokên HDP'ê Sebahat Tûncel û Ertûgrûl Kurkçu bang li Neteweyên Yekbûyî kirin ku kurdan dawetî Konferansa Cenevre-2 bike.

Hevserokên HDP'ê dan xuyakirin ku Kurdan bi Peymana Hewlêrê re biryar dane bi awayekî hevgirtî beşdarî konferansê bibin û gotin, "Bi dîtina me, modela xweseriya demokratîk a li Herêma Rojava derfet daye gavavêtinên ji bo aştî û aramiyê, ji bo gelemperiya Sûriyeyê rêyeke ku dikare rê li ber jiyana bi hev re ya hemû gelên xwedî nasnameyên cuda veke." 

Hevserokan ji bo konferans nebe civîneke mêran bi tenê, bal kişandin ser girîngiya beşdariya jinan.

Hevserokên Partiya Demokratîk a Gelan (HDP) Sebahat Tûncel û Ertûgrûl Kurkçu, der heqê krîza Sûriyeyê ku bandoreke kûr li Rojhilata Navîn dike û Konferansa Cenevre-2 ya wê di 22'ê rêbendanê de bê lidarxistin, nameyek ji fikar û gumanên xwe pêk tê, ji Sekreterê Giştî yê Neteweyên Yekbûyî (NY) Ban Ki-moon re şandin.

Di nameyê de hat gotin, "Wekî Partiya Gelan a Demokratîk, em serhildana li dijî zextên rejîma Baasê ji roja destpêkê ve dişopînin. Di rewşa heyî de, ji ber ku ev serhildan bi destwerdana derve re veguheriye şerekî navxweyî, em gelekî bi fikar û guman in." Di nameya HDP'ê de hat destnîşankirin ku Konferansa Cenevre-2 ya li ser pêşeroja Sûriyeyê ji bo gelên Rojhilata Navîn û Tirkiyeyê gelekî girîng e.

Hevserokên BDP'ê dan xuyakirin ku ew Konferansa Cenevre-2 ji bo avakirina rêveberiya demokratîk a gelan û pêkhatina aştiyê ya li Sûriye û herêmê weke gaveke girîng dibînin û gotin, "Lê belê serketina vê civînê ancax bi beşdariya Ereb, Kurd, Suyanî, Durzî, Elewî, Sunî, Xiristiyan û hemû gelên ên li Sûriyeyê dijîn, pêkan e. Ji ber vê yekê divê ji bo beşdariya li civîna Cenevre-2 bang li Desteya Bilind a Kurd bê kirin ku beşeke mezin a gelê Kurd temsîl dike.

Li gorî Peymana Hewlêrê ya di 24'ê Kanûna 2013'an de li Herêma Kurdistana Federal a Iraqê di navbera Meclîsa Gel a Rojavayê Kurdistanê (MGRK) û Encumeya Niştimanî ya Kurdên li Sûriyeyê (ENKS) biryar hat dayîn ku Kurd weke aliyekî sêyemîn beşdarî civîna Cenevre-2 bibin."

Di nameyê de hat destnîşankirin ku ev peymana di navbera her du meclîsan de hat morkirin, li Tirkiyeyê ji aliyê Partiya Aştî û Demokrasiyê, li Başûrê Kurdistanê ji aliyê Serokê Herêmê Mesûd Barzanî û hemû partiyên din ên Kurd ve tê destekkirin û hat gotin, "Partiya Demokratîk a Gelan piştgiriyê dide vê peymanê. Ji ber ku, eger Kurd weke aliyekî sêyemîn ê li gorî vê peymanê beşdarî civînê bibe, wê ji bo pêşeroja Sûriyeyê û herêmê, hêviyek derkeve holê. Bi dîtina me, modela xweseriya demokratîk a li Herêma Rojava derfet daye gavavêtinên ji bo aştî û aramiyê, ji bo gelemperiya Sûriyeyê rêyeke ku dikare rê li ber jiyana bi hev re ya hemû gelên xwedî nasnameyên cuda veke." 

‘TEMSÎLIYETA JINAN GELEKÎ GIRÎNG E’

Hevserokên HDP'ê di nameya xwe de bal kişandin ser girîngiya temsîliyeta jinan di civînê de û gotin, "Ji bo civîna Cenevre-2 nebe civîneke mêra, divê hewldan bên kirin. Şer bandoreke cudatir li jinan dike û mîna ku di biryara bi hejmara 1325'an a Neteweyên Yekbûyî de tê gotin, eger jin di hevdîtinan de li her qadên çareseriyê bi awayekî wekhev cih bigirin, wê feydê bide aştiyeke mayînde.

Em bang li tevahiya gelên Tirkiye, Rojhilata Navîn û Cîhanê dikin ku ji bo avakirina rejîmeke demokratîk a Sûriyeyê bikevin nava hewldanan. Em piştgiriyê didin beşdariya Kurdan û jinan bo civîna Cenevre-2. Em gelekî bi fikarin ku bi rêya şer El Qaîde li herêmê xurt dibe û em modela xweseriya demokratîk a li Rojava jî, li dijî van xeteriyan weke garantiyekê dibînin."