Parîs
Ji duh êvarê de bi hezaran kes berê xwe dan Parîsê û li Gare de l’Est (Gara Rojhilat) a li Parîsa kom bûn. Bi deh hezaran kes beşdarî meşa ji bo şermezarkirina komkujiya li Parîsê bû.

Ji danê sibê ve kolana ku diçe cihê çalakiyê bi kurdan tije bû. Derdora garê tije mirov bûn. Esnafên kurd derabe daxistin û tevlî çalakiyê bûn.

Qada ku girseya gel lê kom bû, li nêzî Navenda Enformasyona Kurdistanêye. Siyasetmedarên kurd ji damezrênerên PKK’ê Sakîne Cansiz, nunera KNK’ê ya Parîsê Fîdan Dogan û endama tevgera ciwan Leyla Şaylemez roja 9’ê rêbendanê li vê Navendê hatibûn qetilkirin.

Qad bi alên KCK, PKK, PJAK, PYD, rêxistinên jinan KJB û PAJK û posterên Serokê PKK'ê Abdullah Ocalan hat xemilandin. Her wiha nûnerên partiyên başûrê Kurdistanê û partî û rêxistinên Fransayê jî tevlî xwepêşandana girseyî bûn.

Rêxistinên çepgir ên Tirkiyeyê wekî MLKP, MKP, ATİK, DİDF, DHK, DKP, ADHK, EOÇ û KDO tevî al û pankartên xwe tevlî çalakiyê bûn. Partiya Komunîst a Kurdistanê û Civata Îslamî ya Kurdistanê (CÎK) jî bi rengê xwe tevlî çalakiyên bûn.

Her wiha, rêxistinên Êzidî û Elewî jî piştgirî dan çalakiyê. Asurî-Keldaniyên li berbajara Villiler-le-Bel a Parîsê dijîn derabeyên dikanên xwe venekirin û piştgirî dan kurdan.

Kurdistaniyên ji her çar parçeyên Kurdistanê tevlî çalakiyê bûn. Çapemeniya Fransî ya ku bi rojan e li cihê bûyerê ye, îro jî eleqeyek mezin nîşanî çalakiya kurdan da.

Her ku çû tevlîbûna xwepêşandanê bi berdewamî zêde bû û girse heta Qada Colonel Fabien meşiya. Hevserokên BDP’ê Gultan Kişanak û Selahattîn Demîrtaş, Hevseroka KCD’ê Aysel Tûglûk jî tevlî meşê bûn. Siyasetmedarên kurd ên li Ewropayê û nûnerên sazî û rêxistinên kurdan jî di meşê de amade bûn.

Piştre jî bi tevlîbûna bi 10 hezaran kesî meşek hate lidarxistin. Kurdistaniyên ku serê sibê zû li Gare De l'est hatin cem hev û xwestin bimeşin lê ji ber ku qada kombûnê teng bû û têrî bi deh hezaran kesî nekir, meşa ku wê saet 12.00’an dest pê kiriba hate paşdexistin.

Piştî meşeke dirêj saet li nêzî 14:00'an serê korteja kurdan a meşê xwe gihanda qada ku wê mîtîng lê pêk were, Kolonel Fabien. Gelek partiyên siyasî yên Fransayê, sendîkayan û rêxistinên çep ên Tirkiyeyî jî cihê xwe di meşê de girtin.

Ji 7 salî heta 70 salî bi deh hezaran kes wekî lehiyê herikîn cihê wê lê mitîng pêk were. Piştî ku mitîngê dest pê kir bi 2 saetan jî dawiya korteja kurdan nehat û bi hezaran kes herikîn qadê.

Li qadê piştî rêzgirtinê, Serokê Federasyona Komeleyên Kurd Mehmet Ulker axivî û ji bo beşdarbûna zêde malavahiya gel kir. Hevseroka Giştî ya BDP'ê Gultan Kişanak jî axivî û got: "Ez li ber her sê qehremanên jin li ber têkoşîna wan, ku îro bûne sedama vê hevdîtina mezin bi rêz bejna xwe ditewînim."
Kişanak diyar kir ku ewê 3 fîdanên têkoşîna jinên kurd ber bi dawiyê ve bişînin. Gultan da zanîn ku niha ew li ser navên wan ji vir diqîrin û wiha axivî: "Em vê komkujiyê şermezar û nelet dikin." Kişanak bang li hikumeta Fransayê kir ku komkujiyê zû ronî bike û wiha got: "Tu komkujî, mirin, zilm nikare pêşî li têkoşîna azadiyê ya jinên kurd bigire. Emê wekî jin di refên pêş ên vê têkoşînê de her tim cihê xwe bigirin û xwe nedin paş."

Piştre Hevseroka Kongreya Civaka Demokratîk (KCD) Aysel Tugluk jî axivî û daxwaza ronîkirina bûyerê ji hikumeta Fransayê kir. Li ser navê Tevgera Jinê ya Kurd jî Sakîne Karakoçan axivî û wiha got: "Her 3 hevalên me bi rûreşiyeke mezin înfaz kirin. Ew li ser rastiya heqîqeta rojê dimeşiyan, ew ji roniya wan tirsiyan. Karakoçan destnîşan kir, ku ewê serê xwe li ber vê komkujiyê netewînin. Bila ew kes û hêzên komkujî pêk anîne, ew rûreş, vî gelî, vîna vî gelî bibînin, û binêrin ka Sakîne, Fîdan û Leyla mirine an na?"

Serokê Kongra Gel Remzî Kartal jî daxwaza ronîkirina komkujiyê kir û bang li Yekîtiya Ewropayê kir ku PKKê ji lîsteya terorê derxe û wiha got: "Çawa tu lîstik, plan û konsept li dijî gelê kurd neçûn serî wê ev jî neçin serî, dê gelê kurd bi ser bikeve. Heke dixwazin Yekîtiya Ewropayê û bi taybetî Fransa dixwazin di vê pêvajoya aştiyê de cih bigirin, bila vê bûyerê ronî bikin."

Mîtîng bi axaftinên mêvanên ji sazî û rêxistinên biyanî berdewam kir. Tevî nunerên kurdan gelek rêxistin û parlementerên Fransî jî amade bûn. Her wiha derdora 50 rêxistinên jin ên Fransî jî amade bûn û peyam dan.

***

Nûçeyên eleqedar:

- Serokomarê Fransayê: Min yek ji wan nas dikir

- Li ser bûyerê kî çi got?

- Li Parîsê 3 siyasetmedarên jin ên kurd hatin qetilkirin