Nûçe-şirove / Diyarname

Ev ne henek, pirsa rojê ye: Bi ya we Şaredarê Wanê li ku derê ye?

li Wanê 3'yemîn Tûrîsma Fûarê ya Wanê vebû. Cîgerê Şaredarê Wanê beşdarî vebûna fûarê nebû. Wezîrê Çandê yê Tirkiyeyê Ertugrul Gunay di vekirina fûarê de bertek nîşanî beşdarnebûna cîgerê şaredar daye û wisa gotiye: "Ez hevalê me Şaredarê Wanê ku li Wanê min nedît li fûarên Îzmîr, Stenbolê bibînim ezê bi awayekî gelek cidî rexne bikim."

Wezîr herhal nezaniya Şaredarê Wanê ku gelê Wanê jê razî bû niha girtî ye!
Em bên ser meseleya Cîgirê Şaredar: Li gor nûçeya DÎHA'yê Cîgerê Şaredarê Wanê Selim Bozgiyit dê li ser navê Şaredariyê beşdarî fûarê biba lê ji ber ku di protokolê de cih nedane wî û axaftina wî jî ji nav bernameyan derxistiye vekirina fûarê protesto kiriye û neçûye wir. Di heman demê de Bozyigit Waliyê Wanê Munir Karaloglu û saziyên ku li hemberî vî kirinê bêdeng maye şermezar kiriye.

Herhal niha hinek rewşe zelal bû: Şaredar li girtîgehê, cîgerê şaredar ku divê di protokolê de be cih nadinê û paşê jî Wezîrê Çandê gotina xwe dibêje. Em jî bibêjin: Temam kengê te Şaredarê Wanê li Fûarên Îzmîr, Stenbolê dît tu çawa rexne dikî, tu bi kêfa xwe yî.

Wekî nota dawî: Fûar roja 14'ê mehê dest pê kir û 16'ê mehê bi dawî bû. Cîgirê Şaredarê Wanê piştî fûarê ku heta wê kêliyê walî û saziyên din bêdeng man, daxuyanî da ajansê.

Fûara Tûrîzmê ya Wanê ji aliyê Wezareta Çand û Tûrîzmê ya Tirkiyeyê, Walîtiya Wanê, TURSAB û Odeya Sanayî û Ticaretê ya Wanê ve hatibû organîzekirin.