Diyarname
Endama Dayikên Aştiyê Sakîne Arat êvara 12'yê mehê canê xwe ji dest da. 
Piştî Serhildana Şêx Seîd bavê Sakîne Arat sirgûnê Kutahyaya Tirkiyeyê kirin. Sakîne Arat jî di sala 1935'an de li Kutahyayê tê dinê. Piştî ku hikumeta Partiya Demokrat a Tirkiyeyê efûyê derdixe di sala 1947'an de malbata Arat vedigere Amedê. 
Aratê di 17 saliya wê de bi kesê temen mezin re didin zewicandin. Her çend ewil zewacê qebûl neke jî di dawiyê de neçar dimîne ku zewacê qebûl bike. 10 zarok jêre çêdibin. 2 zarokên wê dema hê biçûk bûn canê xwe ji dest didin. 
Ew di temenê xwe yê biçûk de hem dixebite û hem zarokan xwedî dike. 8 zarokan bi kedek zêde mezin dike.
Ji zarokên wê Cemal Arat di dema Derbeya 12'yê Rezberê de tê girtin; di sala 1984'an de di greva birçîbûnê de canê xwe ji dest dide.
Kurên wê Tacettin û Murat diçin çiyê û di şer de canê xwe ji dest didin. Keça wê Semra dema di 17 saliya wê de bi zorê wê dizewicînin ew întîxar dike.
Di salên 80'yan de li hemberî îşkenceyê ew ligel hin dayikên din diçe Enqereyê û ligel Serokwezîrê wê demê Turgut Ozal dicivin, daxwaza rawestandina îşkenceyên ili girtîgehan dikin.
Arata ku demek dirêj di nav ÎHD'ê de cih girt, dema çalakiyên Dayikên Aştiyê dest pê kirin, ew jî di nav de bû. Di sala 2010'an de ligel Serokwezîrê Tirkiyeyê yê wê demê Recep Tayyip Erdogan jî hevdîtinê dike.
Arat her wiha di nav xebaten HADEP, DEHAP; HDPê de jî cih girt.