BERLÎN
Di beşa Tirkiyeyê ya Rapora Pêşketinê ya Komîsyona Yekitiya Ewrûpayê de cih girîng dane azadiya çapemeniyê, azadiya ramanê û mafê mirovan. Hate diyarkirin ku wê Komîsyona YE’yê daxwaza serbestberdana parlementer û şaredarên BDP’yî bike.

Wê sibe her kes li benda Brûkselê be. Wê Komîsyona Yekitiya Ewrûpayê sibe Rapora Geşedanê (Pêşketin) ya der barê welatên berendam û erkê ku YE dabû pêşiya wan de, li Brûkselê aşkere bike. Lê ji niha hin agahiyên girîng ên raporê di çapemeniya Ewrûpayê de cih digirin.

Di raporê de rexneyên girîng li berendama YE’yê Tirkiyeyê tê kirin. Di raporê de cewhera bûyerên siyasî yên salekê hatine diyarkirin û her wiha qarneya mafê mirovan a Tirkiyeyê hatiye dagirtin.

YE di raporê de bi bîr dixe ku Tirkiye di azadiya çapemeniyê de li paş ve maye û balê dikişîne ku zêdetirê 60 rojnameger di girtîgehan de ne. Di raporê de tê diyarkirin ku rojnamegerên desthilariyê rexne dikin û der barê pirsgirêka Kurd de dinivîsin, di hedefê de ne û di raporê de ji bo vê hewldana Tirkiyeyê weke “Bêdengkirina çapemeniya serbixwe” tê binavkirin.

OPERASYONÊN KCK’Ê TÊ REXNEKIRIN

Komîsyona YE’yê, Tiriyeyê ji ber daxwazên Brukselê û reformên xurtkirina mafên sereke pêk neaniye rexne dike û fikara xwe ya li hember darizandinên ku bi salan didomin, nîşan dide. Tirkiye wê di warê daraz û girtinan de herî zêde ji ber operasyonên KCK’ê were rexnekirin.

Bruksel diyar dike ku ‘pêşîlêvekirina demokratîk” a ku ji bo çareseriya pirsgirêka Kurd hatibû destpêkirin, berdewam nekiriye û daxwaza serbestberdana şaredar û parlementerên BDP’yî yên hatine hilbijartin bike. Her wiha li gor raporê, sîstema Qorîcîtî (Cerdevan) a li bajarên Kurdistanê hêj jî rê li ber demokratîkbûnê digirin.

Di raporê de tê gotin polîtên tundiyê bi kar tînin nayên darizandin û dozên wan weke rûviyê dirêj dibin. YE di rapora xwe de bi taybet dixwaze ku Tirkiye dest ji polîtîkaya xwe ya li hemberî Qibrisa Bakûr berde. Di Rapora Geşedanê de ev mijarên din cih digirin: tundiya li hemberî jinê, gendelî û parastina kêmeneteweyên ne Misilman.

Ji ANF'ê hatiye girtin