Diyarname
Mebûsê DEM Partî yê Mehmet Ruştu got, "149 caran kayûm şandine ser şaredariyên kurdan. Ev yek neyartiya kurdan e û bi kayûman li hemberî çanda kurdî komkujî çêkirine."
DEM Partî li ser texrîbatên çandî yên ku kayûman çêkirine pêşniyarnameya lêkolînê da Meclisa Tirkiyeyê. Ev pêşniyarname hat nîqaşkirin. Li navê ser DEM Partiyê mebûsê DEM Partî yê Batmanê Mehmet Ruştu Tiryakî axivî.
Va ne notên ji axaftina wî:
- Di navbera salên 1999-2016'an de şaredariyên me çi kirin? Mînak Amed bajarek 2 mîlyonî ye, niha em ava paqij didin Amedê. Ev yek tê wê wateyê ku me pirsgirêka binesaziya bajêr çareser kiriye. Me park û bexçe çêkirin ku ev dê 50 sal paşê jî têrê bikin.
- Yekem car firsenda gel çêbû bi zimanê xwe yê zikmakî perwerdehiyê bibîne. Ji tenûra bigire heta her tiştê bê bîra we ku jiyana mirovan hêsantir kiriye, şaredariyên me çêkirin.

NEYARTIYA KURDÎ YA KAYÛMAN
- Bi pirzimanî şaredariyên me bi kurdî, tirkî, erebî, suryanî tabela danîn. Baş e, kayûman çi kir? Tiştê herî mezin ku kayûman kir ew bû, neyartiya kurdî.
- Li 14 bajar û navçeyan 21 navendên çand û hunerê hebûn, hemû girtin, xebatên wan asteng kirin. Nêzî 220 çalakiyên çandî yên wekî pêşangeh, perwerdehî, nîşandayîna fîlman,lîstikên şanoyê betal kirin. 
- Şaredariya me ya Bajarê Mezin a Wanê her sal dersa perwerdehiya çand û hunerê dida dor 1000-1200 kesî, kayûman ew betal kirin.

SALONÊN KURDÎ GIRTIN
- Kayûman Sinemaya Yilmaz Guney girt, 
 li Cizîrê Navenda Çandê ya bêrîvanê, li Amedê Konservatûara Bajêr a Aramê Tîgran we girt. Di serî de Şanoya Bajêr a Amedê we hemû xebatên şanoyan betal kirin, şanoger ji kar derxistin. 
- Kayûmê pêşî navê pirtûkxaneya Şaredariya Payîzava guhenad, paşê pirtûkxane girt. Li Sêrtê Pirtûkxaneya Celadet Alî Bedirxan girtin. Li Navenda Çand û Hunerê ya Cegerxwîn ya Kayapinara Amedê 10 hezar pirtûk hebûn, ez peyvek din nabînim, we ew xwarin, we 9700 hebên wan winda kirin, we tenê 300 pirtûk hiştin.
- Binêrîn 15 roj berê we kayûm şand ser Şaredariya Batmanê, gava pêşî çi kir? Kurdî ji malpera şaredarî rakir.

BELGEYEK TUNE YE
- Bi îdîaya "finansa terorê" 149 caran kayûm şandin ser şaredariyên me, lê tenê belgeyek heye? Na. Ev hemû derew in..

ROJEK PIŞTÎ HILBIJARTINÊ DAXWAZA KAYÛMÊ
- Binêrin, li Xelfetî, rojek piştî hilbijartinê, hê me mazbata negirtiye ji bo kayûmê serîlêdan kirin. Kayûma we mîlyarek deyn hişt. Mehane hatina Xelfetî çi ye? 8 mîlyon. Yanê 10 salan deynan bide dike 960 milyon. We ew kayum kir berendam, hûn bi ser neketin, we carek din bi kayûmê dest danî ser şaredarî.
- Îro hûn referandûmê çêbikin li bajarên ku we kayûm şandine wir dê ji kayûmên we re bejin 'na'.