Diyarname

Ev 5 sal in li Çanakkaleyê Bîenal li dar dikeve û Derhêneriya Hunerê ya Bîenalê jî Beral Madra dike. Bîenal îsal dê 24'ê mehê dest pê bikira û 6'ê meha sermawezê de bi dawî biba lê berî destpêkirinê bi sê hefteyan bîenal hat betalkirin.

Şaredariya Çanakkaleyê di destê CHP'ê de ye. Şaredarî dikare bi serê xwe biryara lidarxistina çalakiyeke wisa bide, dikare betal jî bike lê li vir rewşek din heye. Wekîlê Serokê Koma AKP'ê Bulent Turan li ser çend roj berê daxuyaniyek weşand û got: "Gerînendetiya hunerê ya bîenala bajarê me Beral Madra dike ku ew ji CHP'ê wêdetir parêzvaniya HDP'ê û di heman demê de piştgiriya derbeyê dike. Gelek hunermendên bi rûmet hene ku dikarin hemû civakê hembêz bikin ji dêvla wan çima di navê Beral Madra de israr tê kirin? Em bang li şaredarî dikin ku piştgirî nede vê çalakiyê. Herî hindik şertê derxistina navê Beral Madra bê kirin. Ji awilên parêzvanên edrbeyê hunermend bibe çi ye, nebe çi ye?"

Piştî van gotinan Beral Madra daxuyandibû ku ger mesele ew e dikare dest ji kar berde, bila tenê tiştek bi bînealê neyê. Lê bi ser vê re zêde dem derbas nebû, Şaredariya Çanakaleyê daxuyaniyek weşand û got ku bîneal ji hunerê wêdetir bi nîqaşên din hatiye rojevê û di dawiyê de betalkirina bîenalê ragihand.

'Dikandar HDP'yî be em neçin dikanê?'

Gazeteduvar li ser vê yekê serî li dîtinên hin hunermenda daye. Yekj i wan kurator û nivîskar Vasif Kortun e ku wisa gotiye: "Çi eleqeya dîtinên siyasî yên Beral Madra û derhêneriya hunerî ya bîenalê heye? Em çima her du mijaran di heman tiştî de bikar tînin? Doktor ji ber ku AKP'yî ye em neçin cem tedawî nebin? Dikandar HDP'yî be em jê tiştan nekirin, ji ber ku ajokarê otobusên gel ji CHP'ê be em siwarê otobusê nebin? Ev çi feresat e heyran? Ez bawerim Beral xanim ne xwedî fikra parastina derbeyê ye, jixwe ev jî meseleyek din e."

Hunermend û nivîskar Şener Ozmen jî gotiye ku li hemberî vê yekê şaşwaz nebûye, ji ber ku rewş guncan e, hema her tişt bi rehetî dikare bê sûcdarkirin û bê girtin, mixabin beşek mezin a civakê ji bo vê amade ye. Dest avêtine gelek tiştî, ma dest neavêjin hunerê dibe?

Sosyolog û kurator Alî Akay jî qala keda Beral Madra a ku îmze avêtiye bin gelek bîenalên pêşîn ên Tirkiyeyê û diyar kiriye ku tiştek normal e ew Bîenala Çanakkaleyê bi rê ve bibe.