AMED
Konferansa Zimanê Kurdî ku 3 rojan li Amedê dom kir bi dawî bû. Encamnameya konferansê bi daxuyaniyeke hate eşkere kirin. Di encamnameyê de ji bo ku kurd bi zimanê xwe biaxivin bang hate kirin û her wiha lijneya ku ji 31 kesî pêk dihat hate avakirin.
Hevserokê KCD'ê Ahmet Turk axivî û diyar kir ku berhevbûna zimanzanan a li Amedê gelek girîng e û wiha got: "Bila hemû gelên cîhanê bizanin ku gelê kurd ne bê rûmet, bê nasname û bê statu ne. Gelê kurd vê yekê tu carî qebûl nake.

Di dîwana ku ji bo encamnameyê hatibû amadekirin de Hevserokê KCD'ê Ahmet Turk, enamê Komîsyona Ziman a KCD'ê Ozdal Uçar û delegeyê ji derve hatibûn cih girtin. Turk diyar kir ku piştî nîqaşên 3 rojan encamên girîng bidestxistine û got: Ev nîqaş ji bo pêşeroja kurdan pêngavên girîng in.
Turk da zanîn ku roj roja yekîtiyê ye û got gelê kurd bi salane li hemberî îmha û asîmîlasyonê têkoşînê dide.

Piştî axaftina Turk ji aliyê endamên Komîsyona Ziman a KCD'ê Ozdal Uçer ve encamnameya ku ji 13 xalan pêk dihat hate xwedin:

1) Hebûna zaravayên kurdî dewlemendî ye, parastin û geşepêdana wan jî peywireke neteweyî ye.

2) Di van rojên wisa de ku Konferansa Neteweyî ya Kurdî di rojevê de ye, divê ku kurd jî xwedî bername û siyaseteke neteweyî ya ziman be.

3) Ev Konferans standardiya navxweyî ya her zaravayî pêwîst dibîne, lê belê di dema berhevkirina zargotinê de divê ku her tişt li gorî devoka xwe bê tomarkirin.

4) Ji bo ji hev têgihîştina kurdan û pêkhatina hişmendiyeke neteweyî hewcedarî bi yek alfabeyê heye. Heta gihîştina vê qonaxê, ji ber guncanbûna rewşa li Başûr, divê ku her du alfabe jî li wir di perwerde û her warî de bên bikaranîn.

5) Ev konferans perwerdehiya bi zimanê kurdî mafekî sirûştî yê neteweyî dibîne û lew re ji pêşdibistanê heta zanîngehê perwerdehiya bi kurdî daxwaz dike. Ev yek jî bi statuyayeke siyasî ve pêkan e.

6) Konferansa me ji bo avakirina civakeke demokratîk û plûrealîst pergaleke perwerdeyê ya ku bextewarî û pêşvebirina mirovan esas dibîne, pêşniyaz dike.

7) Ji bo pêkanîna bernameyeke zimanî ya neteweyî pêdivî bi avakirina tevgereke zimanî ya Kurdistanî heye, da ku bikaribe kar û pêwistiyên zimanê kurdî bi cih bîne. Ji bo avakirina tevgerê desteyeke ku ji 31 kesan pêk tê, hate hilbijartin.

8) Konferansa me bang li kurdan dike ku di her qada jiyanê de zimanê kurdî bi kar bînin û pê bijîn.

9) Konferans li xebat û têkoşîna gelê me yê Başûrê Rojava ya di warê ziman û perwerdeyê de silav dike û piştgiriya xwe diyar dike.

10) Em piştgiriya xwe ji bo daxwaza girtiyên kurd ên siyasî ya di warê parastina Zimanê kurdî de radigihînin.

11) Em polîtîkaya AKP'ê û helwesta rayedarên wê ya der barê ziman û çanda kurdî de şermezar dikin û em vê siyasetê jî berdewamiya siyaseta asîmîlasyon û înkarê dibînin. Bi heman şêweyî em siyaseta rejîmên din ên li ser kurdan jî bi tu awayî napejirînin.

12) Konferansa me operasyonên leşkerî û siyasî yên li ser kurdan tên meşandin şermezar dike, ji bo çareseriyê diyalog û muzakereyê pêşniyar dike.

13-) Ji bo pêşvebirina zimanê kurdî zarok pir girîng in. Lewra jî di polîtaka û bernameya ziman, a neteweyî de divê zarok cihekî taybet bigrin.