Tayîp TEMEL

Li Kurdistan û Tirkiyeyê pêvajoya hilbijartinê nêzîk dibe û rojeva siyasî her ku diçe germ dibe. Piştî bi salan, cara yekemîn e ku Tevgera Siyasî ya Kurd bi nav û rengê xwe tevli hilbijartinê dibe. Vê carê ne tenê xîtabî gelê kurd dike, bi proje û zimanê xwe bangî hemû gelên ku li Anatoliyayê dijîn dike. Bêguman ji niha de îşaretên şerê taybet û psîkolojîk ê ku dê dewlet li hemberî projeya HDP’ê bixe pratîkê, xuya dibin. Di serî de lazim e bê gotin ku ev pêkanîn û êrîşên fizîkî, siyasî û civakî teqez ji polîtîkaya hikûmet û dewletê cuda nîn in. Ceribandineke balkêş pêk anîn. Li Zanîngeha Egeyê di bin navê şerê ciwanên HDP’î û MHP’î de provokasyon pratîze kirin. Niha jî di gelek bernameyên televizyonan de hewl tê dayîn ku li ber çavê civaka Tirkiyeyê HDP’ê wekî partiyek nijadperest a kurd nîşan bidin. Armanc ew e ku her wekî HDP bi MHP’ê re ketiye qayişkêşanê, nîşan bidin. Ev operasyoneke jibîrbirin û tevlihevkirina têgihîştina civakî ye.

HDP ne tenê alternatîfa MHP’ê ye. Ew proje di serî de alternatîfa AKP’ê û hemû partiyên pergalê yên li Tirkiyeyê ye. Lîstika li Tirkiyeyê Xuya ye dê serî li hin rêbazên din jî bidin. Li Tirkiyeyê dê hewl bidin bi riya çeteyên faşîst pêşî li xebatên hilbijartinê bigirin û HDP’ê bikişînin nav atmosfereke aloz. Bi vî awayî dê propagandaya derew a ‘HDP yek ji partiyek nijadperest û teng e’ belav bikin. Ji ber vê yekê jî divê armanca esasî ya karbidestên vê partiyê ew be ku li Tirkiyeyê ziman, axaftin û xebatên xwe yên pratîk li gorî naverok û cewhera ‘Projeya Biratiya Gelan’ bimeşîne. Her wiha divê derfetê nede ku elemanên şerê taybet wê bi pevçûnên lokal re mijûl bikin. Lîstika li Kurdistanê Aliyê vê lîstikê yê Kurdistanê jî heye û ne hewce ye ku mirov xêwzan (pêşgo) be da ku mirov bibîne.

Dê hewl bidin ku bi derewan û di bin slogana ‘HDP ne partiyek Kurd û Kurdistanî ye’ de, kampanyayek berovajî ya li Tirkiyeyê bimeşînin. Ji niha de hem ji aliyê hêzên hevkarên dewletê yên ku xwe wekî ‘îslamî’ bi nav dikin, hem jî ji aliyê hêzên marjînal ên nijadperestiya kurd diparêzin ve, li hemberî HDP’ê hewlên reşkirinê pêş dikevin. Li dijî vê yekê jî lazim e HDP teqez hemû hêzên Kurdistanî di nava xwe de bihewîne û derfetê nede vê lîstîka bêbingeh. Yên ku neyên vê tifaqê, ji xwe dê ew hêz teşhîr bibin ku ‘benên wan di destê desthilatdaran de ye’. Lewre xuya ye ku ew ê bi tenê bimînin û tu bandora gotina wan jî namîne. Wekî encam hem ji aliyê atmosfera herêmî û hem jî ya cîhanî ve, ba û bahoz vê carê alîgiriya HDP’ê dike. Ji her demê zêdetir derfetên serkeftinê hene. Tişta pêwîst ew e ku ji hemû aliyan ve xebatek berfireh bê meşandin. Serkeftina HDP’ê ne tenê şandina çend parlementeran a meclisê ye. Her wiha diyarkirina qedera hevdîtinên çareseriyê ye

28.02.2015, Azadiya Welat