Diyarname

Maçên "Koma Kujer" jî hatin lîstin Di her du maçên dawî de tam 8 gol hebûn û di dawiyê de yên ku bilêta Dora 16'an girtin Fransa, Almanya û Portekîz bûn.

Vê êvarê maçên dawî yên komên tûrnûvaya Euro 2020 hatin lîstin. Komek gelek dijwar bû loma navê "Koma Kujer" lê kiribûn. Li aliyek Fransa, Macaristan, li aliyê din Almanya û şampiyona dawî Portekîz hebûn. Meraq ew bû ji van tîman dê kîjan vegere mala xwe, kîjan rêya xwe bidomîne. Û îro maçên sêyemîn, yanê maçên dawî yên komê hebûn.

Berî maç dest pê bike di Koma F de rewş ev bû: Fransa 4 pûan, Almanya 3 pûan, Portekîz 3 pûan û Macaristan xwedî pûanek bû.

Di her du maçan de tam 8 gol hebûn ku her du maç jî bi 2-2 bi d awî bûn.

RONALDO Û BENZEMA

Maça Fransa û Portekîzê maçek bi heyecan bû. Fransa rewşa wê baş bû, bi her awayî dê ji komê derketa lê ji bo portekîzê pûan lazim bûn. Di deqîqeya 31'ê de Portekîzê penaltiyek bi dest xist. Kaptanê tîmê Ronaldo gog pêşî li ser xala sipî danî, paşê ew bi torê ve çikand: 0-1. Dûre di deqîqeya 45'an de vê carê Fransayê penaltî bi dest xist û Karim Benzema got wekhevî lazim e: 1-1.

Di nîveka duyemîn de vê carê Fransa bi golê dest pê kir. Di deqîqeya 47'ê de Karim Benzema careke din gol li ser navê xwe û tîma xwe qeyd kir: 2-1. Lê di deqîqeya 59'an de Ronaldo careke din ji penaltiyê wekhevî saz kir.  Bi vê encamê her du tîm jî ji komê derketin.

ALMANAN DEST JÊ BERNEDA

Maça din jî bi heyecan bû. Ji bo Macaristanê tenê serketin diviya, wekhevî jî bi kêr nedihat, lê ji bo Almanyayê tenê pûanek jî têrê dikir. Macaristanê di deqîqeya 11'an de bi gola Adam Szalai derket pêş û nîveka yekemîn bi vî awayî bi dawî bû.

Almanyayê di deqîqeya 66'an de bi Havertzî bersiv da, lê Macaristanê di du deqîqeyan de bi Schafer bersiv da û encam kir 2-1. Macar derketin pêş lê nekarîn vê rekorê biparêzin, ji ber ku panzêran di deqîqeya 84'an de bi Goretzka encam anî 2-2'yê.

Bi van encama di komê de rewş wisa çêbû: Fransa bi 5 pûanan wekî yekemîn, Almanya bi 4 pûanan wekî duyemîn û Portekîz jî bi 4 pûanan wekî sêyemîn ji komê derket.

**

Maçên din ên tûrnûvayê:

- EURO 2020 RÛPELA TAYBET