Diyarname

Nûçe bi vî rengî ye: Li Brîtanyayê MI5 saziya ewlehî û îstîxbaratê ye. Ajanekî MI5’ê ji bo hezkiriya xwe bitirsîne “statuya xwe ya veşarî” bikar aniye. BBC li ser vê yekê rabû nûçe çêkir. Hikumetê jî çima ku BBC nûçe çêkiriye rabû der barê BBC de doz vekir û xwest nûçe ji nav weşanê bê rakirin. Lê BBC ber xwe da.

AJAN NEYARÊ JINAN E

Li gor nûçeya BBC ajanê MI5 xwedî paşerojeke bi şîdet e û di heman demê de rastgirek tundiraw e. BBC 19’ê mehê li ser wî nûçeyeke belav kir. Li gor nûçeya BBC keça bi navê Beth (ji bo parastina wê bernav bikar anîne) û ajanê MI5’î di malpereke hevnasîna keç û kuran de hev nas kirine. Wan herduyan dest bi hev re jiyînê kiriye. Ev têkiliya di destpêkê de xweş bû, lê her ku çûye bûye wekî kabûsê. Bi demê re derketiye holê ku ajan ‘xwediyê şîdetê ye, zilmkar e û neyarê jinan e’. Li gor îdîayê wî rewşa xwe ya li saziyê bikar aniye û li hemberî jinê êrîşê cinsî kiriye. Her ku çûye rewşa Bethê xira bûye û ji aliyê aqil ve problemê wê derketine.

TIRSA KUŞTINÊ

Mexdûrê wisa gotiye, “Min nediwêrî şîdeta cinsî û fîzîkî ku li hemberî min kiriye bînim ziman, ji ber ku di asta bilind de her yên pişta wî digirin hebûn. Ger min xeber bida, dê wî ez bikuştama.””

Di roja ku ajanî eziyet li jinê kiriye polîs hatine malê û ew girtine bin çavan. Bi sûcdariya êrîşê Bethê kiriye ew derxisin dadgehê. Serwîsa Dozgeriya Kraliyeta Brîtanyayê (CPS) bi sedema “kêmbûna delîlan” doz betal kiriye. Hikumetê bûyer veşartiye, loma jî şîdeta li ser jinê dom kiriye. 

VÎDYOYA ŞÎDETÊ

Dema BBC hay ji meseleyê çêdibe dikeve dû meseleyê û nûçeya mexdûriyeta Bethê belav dike, bala raya giştî kişandiye ser meseleyê.

Vîdyoya ku jinê di dema êrîşê wê dihat kirin de kişandiye ji aliyê BBC ve hatiye belavkirin û bi vê re nûçe ketiye rojevê. Di vîdyoyê de tê dîtin ku ajanê MI5 jinê tehdîd dike û bi kêrê êrîşê wê dike. 
HIKUMETÊ XWEST BBC NÛÇEYÊ RAKE

Hikumetê xwestiye nûçe ji weşanê bê rakirin, BBC zêde bi ser bûyerê de neçe, lê BBC dibêje ku divê jin nasnameyê vî ajanî bizanin û dema ew hay ji vî kesî hebin mimkûn e hinên din ku rast bên, bikaribin xwe biparêzin. Bi vê parastinê BBC nûçeya xwe parastiye, nûçe ji weşanê betal nekiriye û dijî hikumetê derketiye.

BBC nûçe bi berfirehî belav kiriye, lê navê ajan ê eşkere nekiriye, li keysê ye ku eşkere bike. Lê dadgeh hê jî pêşî li saziyê digire ku navê ajan eşkere neke, lê BBC ji bo mexdûriyetên din çênebin nûçeyê derdixe pêş û dixwaze zêdetir di rojevê de bimîne.