Amed
714 rêxistinên sivîl ên civakî bang kirin: "Bila girtiyên KCK'ê bêne berdan, ji bo Ocalan şert û merc bêne pêkanîn û muzakere bên destpêkirin."
Rêxistinên sivîl ên civakî agirbesta du alî pêşniyar kirin û diyar kirin ku ew ê plansaziya çalakiyê ku li hev kirine jî di rojên pêş de eşkera bikin.

Li Amedê 714 rêxistinên sivîl ên civakî duh li hev civiyabûn îro encamnameya civîna xwe pêşkêş kirin. Di civîna ku bi sernavê "Ji bo çareseriya pirsgirêka kurd a bi riyên demokratîk gotineke me heye" li dar ketibû, encamên wê îro li Cemiyeta Rojnamegeran a Amedê hat eşkerekirin.

Daxuyaniya saziyan ji aliyê Serokê GUNSÎAD'ê Şahîsmaîl Bedîrxanoglu ve hat xwendin. Bedîrhanoglu, diyar kir ku ji bo ku pirsgirêka kurd bi reya aştiyane û demokratîk çareser bibe ev komcivîn pêk anîne.

Bedîrhanoglu, bal kişand ser operasyonên girtinê yên li dijî siyasetmedarên kurd, endamên rêxistinên sivîl û demokratîk û platforma saziyên KCD'ê ku hedef hatine girtin û wiha got: "Li hemberî saziyan binçavkirin û girtin tehdîtek cidî pêk tîne. Ev sazî hatine rewşa ku nikarin xwe bi rê ve bibin. Ev jî bingeha demokratîk, azadiya raman û îfadeya mafê rêxistinê bi sînor dike. Tiştê ku ji vê re dibe asteng, pekanînê dewletê yên dijdemokratîk û bê mafiyê ye."

Serokê GUNSÎAD'ê Bedîrhanoglu, xwest ku dewlet dawî li operasyonên siyasî û leşkerî bîne û ji bo bingeha demokratîk ku xurt bibe divê alîkarî bide pêvajoyek nû. Bedîrhanoglu wiha dom kir: "Li dijî siyasetmetarên kurd bi navê KCK'ê operasyon hate dest pê kirin. Pêwîst e dewlet dev ji operasyonê tasfiyeyê berde. Ji bo kesên di pêvajoya dawî de hatine girtin xebatek zagonî bê meşandin."

Îsmaîl Bedîrhanoglu, li ser rewşa Ocalan jî rawestiya û wiha axivî: "Dewlet hevdîtina ku li îmralî û Osloyê di bin navê muzakereyê de pêk anîbû divê berdewam bike. Divê hevdîtin û muzakere dîsa dest pê bikin. Ji ber vê yekê divê bi lezgînî îzolasyon û tecrîta li ser Birez Ocalan bê rakirin. Ji bo Birêz Ocalan di hemû pêvajoyê de roleke bi bandor bigire divê şert û mercên wî bên başkirin."

Bedîrhanoglu, da zanîn ku di civînê de ew hemû bûne hemfikir ku plansaziyeke ava bikin û dê ev plana xwe di rojên pêş de pêşkêşî bi raya giştî bikin.

***

Nûçeya eleqedar:

- Saziyên Sivîl li Amedê civiyan