Diyarname
Messi, lîstikvanê Barselonayê. Hê 24 salî ye û dîrok nivîsî. Vane reqorên ku wî şikandin:

Niha di La Lîga ya Spanyayê de maçên hefteya 28'emîn hatin lîstin. Barselona wekî tîmeke Katalan di lîga Spanyayê de yek ji tîmên herî serketî ye û lîstikvanê wê Messi jî yek ji lîstikvanên herî serketî ye. Messi bi lîstika xwe, bi pasên ku dide, bi beza xwe û her wiha bi golên xwe yên mikemel ku diavêje dilê hemû temaşevanên fûtbolê dagir kiriye. Hema bibêje li ser rûyê dinê, li nav temaşevanên fûtbolê, kesê/a ku ji Messi hez neke tune ye. Her hefte bi mîlyonan kes ji bo Barselonayê, dibe ku herî zêde jî ji bo wî li maçan temaşe dikin. Û ew jî her hefte bi lîstika xwe coşê dide temaşevanên xwe û yên Barselonayê.

Lionel Messi hê 24 salî ye. Di maça dawî ya Barselonayê de ku bi Granadayê re lîst Barselona bi 5-3 bi ser ket û Messi jî sê gol avêt (deqîqe 17, 67 û 86) û di dîroka klûba Barselonayê de bû lîstikvanên ku herî zêde gol avêtiye. Bi van her sê golan golên Messi ku bi formaya Barselonayê avêtine gihîşt 234 heban. Berî niha lîstikvanê Barselonayê Cesar Rodriguez di navbera salên 1940-1950'î de 232 gol avêtibû û wekî kesê herî zêde bi formaya Barselonayê gol avêtiye ketibû nav dîroka klûba Barselonayê.
Niha her kes meraq dike ku Messi dê rekora "Li Spanyayê kesê herî zêde gol avêtiye" bişkîne yan na. Di vî warî de lîstikvanê Athletic Bilbao Telmo Zarra bi 252 golan di dîroka La Lîga de di rêza yekemîn de ye.

Û vane hin rekorên ku Messi şikandine:
- Di klûba Barselonayê de lîstikvanê herî zêde gol avêtine.
- Li La Lîgayê lîstikvanê herî ciwan ku gol avêtiye.
- Bi formaya Barselonayê ri hemû tûrnûvayan de lîstikvanê herî zêde gol avêtiye (Di sala 2010-2011'an de 53 gol avêtibû)
- Di Lîga Şampiyonan de digel Gerd Muller û Jean-Pierre Papin sêyemîn lîstikvanê fûtbolê ye ku sê caran ser hev de dibe qralê golan (yanê hê herî zêde salekê de gol avêtine). Messi ku hê 24 saliye, seqet nekeve, dibe ku cara çaran jî vê yekê bi dest bixe.
- Di Lîga Şampiyonan de, di maçekê de kesê ku herî zêde gol avêtiye ( 7 adar 2012, maça Barselona û Bayer Leverkusen. Di vê maça ku Barselonayê 7 gol avêtin de Messi 5 gol avêt)
- Li gor kovara France Football niha lîstikvanê ku salane herî zêde pere kar dike Messi ye. Kovar radigihîne ku ew salane 33 mîlyon euro pere kar dike. Piştî wî David Beckham (La Galaksy) bi 31.5 mîlyon euro tê û di rêza sêyemîn de jî Cristiano Ronaldo (Real Madrid) tê ku ew jî 29.2 mîlyon euro kar dike.