Diyarname
Koma Şêwira Xwendina Edebiyata Kurdî ku vê carê romana "Otobês"ê nirxand, rexneyên tûj lê kir.

Li Stenbolê komek hezkirên wêjeya kurdî di bin navê "Şêwira Xwendina Edebiyata Kurdî" de tên ba hev, her carê berhemeke bi kurdî digirin dest, li ser nirxandinê dikin. Bû 19 caran kom dicive. Heta niha wan 17 berhev nirxandine.

Koma Şêwra Xwendina Edebiya Kurdî vê carê roja 06.03.2011'an li Seyr-î Meselê hate ba hev û vê carê mijara wan romana "Otobês" a Yunus Eroglu bû ku ji Weşanên Lîsê derketiye.

Kom berî ku bicive radigihîne kesên ji wêjeyê hez dikin û her wiha hevalên wan ku her dem beşdarî civînê dibin û ji wan dixwazin ku berhema ku hatiye pêşniyar kirin bixwînin û di kombûnê de li ser biaxivin.

Di nav kesên beşdarî van civînên komê dibin de xwendekarên zanîngehê yên beşên cur bi cur û yên wêjeyê, endazyar, mamoste û kesên bi beşên din ên çandê re eleqedar dibin jî hene.

Kom, di her kombûna xwe de piştî nirxandinan, ji bo civîna bê pêşniyaran digire û ji wan berhemekê hildibijêre. Koma Şêwira Xwendina Edebiya Kurdî di vê xwendina xwe de "Otobês" xwend, lê wan Otobês neeciband.

Komê piştî civîna xwe bi sernavê "DAXUYANÎ JI BO WEŞANXANEYA LÎSÊ; GERÎNENDEYÊ WEŞANÊ LAL LALEŞ Û EDÎTOR KAWA NEMIR" daxuyaniyek weşandin.

Em jî ji bo rê li ber nîqaşên romanên bi kurdî veke bêyî destê xwe bidin, em daxuyaniya komê diweşînin:

"Li Stenbolê beriya niha bi mehekê me ji bo şêwira xwendina edebiyata kurdî pirtûka Yunus Eroğlu; Otobês hilbijartibû û di 06.03.2011 de hate nirxandin. (Tenê li Stenbolê di hundirê 15 rojan de 30 pirtûk ji bo vê xwendinê hatin firotin.)

Jêderkên xwendinê li jêrê hatine rêzkirin;
1- Tu kesî ji me ji ziman û çîroka vê berhemê fêm nekiriye.
2- Ji bo vê berhemê em ji kurmanciya xwe ketine gumanê!
3- Yên ku Otobês xwendibin û fêm kiribin ji kerema xwe bila me jî li ber xin?!
4- Kesên ku Otobês xwendine û fêm nekirine ji berpirsiyarên vê berhemê dipirsin:
a- Çima em ji kurmanciya Otobêsê û ji şêwaza wê fam nakin? Gelo kêmasî di me de ye?
b- Edîtor jî di nav de, kesên ku ji Otobêsê “fambar” in ji kerema xwe bila bi me jî bidin “fambar”kirin. (Ji ber ku em pê ne bawer in ku gerînende û edîtorê pirtûkê bi çavê xwendinê ev pirtûk xwendine.)
c- Ji bo çi we Otobês çap kiriye?
d- Eger Otobês roman be, wê çaxê roman çi ye? (Bi gumana gelo şêwazeke nû li romanê zêde dibe û em tê nagihîjin!)
5- Nivîsa danasînê kê nivîsandiye? Her kê nivîsandibe tixûbên terbiyê şikenandiye û “tixûbşikên” e.
6- Tu gilî û gazinên me ji nivîskêr tuneye.

Têbinî: Çend hevalên me yên bêcir xwe negirtin û pirtûk bi kargoyê bi şûnd ve şandin. Ma hûn dixwazin kezebê li xwendevanan biperitînin? Çi heqê we li xwendevên heye?"