Zekî Ozmen / Giessen

Li bajarê Giessen ê Almanyayê kursa zimanê kurdî bi awayekî fermî di bin sîwana Dibistana Bilind a Gel (Volkshochschule) û bi piştevaniya şaredariya bajêr serê mehê dest pê dike. 

Kurs bi zaravayê kurmancî ye û ji du polên ji bo kesên nû dest bi fêrbûna kurmancî dikin û ji bo kesên dixwazin kurmanciya xwe bi pêş ve bibin pêk tê. 

Her du kurs jî di çarçoveya kursên din ên Dibistana Bilind a Gel de wê werin dayîn. Kesên bixwazin biçin yek ji her du kursan, pêwîst e xwe li Dibistana Bilind a Gel a bajarê Giessenê tomar bikin. Kurs wê 15 caran werin dayîn û bi giştî her yek ji 30 saetên dersê pêk tê. Buhayê beşdariya kursê jî li gor rewşa dahata beşdaran tê guhertin. 

Mamosteyê kursa ji bo kesên nû fêrî kurmancî bibin Seyfettîn Demir û Saît Kulen in. Ji bo kursa kesên dixwazin kurmanciya xwe bi pêş ve bibin jî mamoste Mesut Kizmaz û Kawa Ismaîl in. 

Komela Civaka Alman – Kurd li Giessen (Deutsch-Kurdische Gesellschaft in Gießen e.V.) ku xwediya projeya kursa kurmancî li Dibistana Bilind a Gel a bajarê Giessen e, gelek caran semînerên derbarê zimên û wêjeya kurdî de jî lidar dixe.