Edene

Xebatkarê rojnameya Azadiya Welat ê Edeneyê, Metîn Alataşê ku bi dareke porteqalan ve dardakirî hatibû dîtin, ji aliyê 20 hezar kesî ve hate veşartin.

Xebatkarê rojnameya Azadiya Welat ê Edeneyê, Metîn Alataşê ku 2 roj berê, piştî belavkirina rojnameyan, agahî jê nehatibû girtin û pişt re jî li nava baxçeyekî porteqalan, bi darekê ve bi dar ve kirî hatibû dîtin, ji aliyê 20 hezar kesî ve hate veşartin.

Cenazeyê Alataş ji aliyê Serokê Rêxistina BDP'yê ya Edeneyê, Zekî Karataş, rêveberên İHD'yê, endamên Ciwanên Welatparêz ên Demokratîk ve, ji Saziya Tiba Edlî ya Edeneyê hate girtin û bi karwanekî anîn Mala Çand û Demokrasiyê ya Daglioglûyê. Cenaze ji vir bi tevlêbûna nêzîkî hezar kesî ve birin ciyê sersaxiyê ya li Taxa Gulbahçesiyê. Esnafan jî dikanên xwe girtin û tevî meşê bûn.

Piştî ku cenaze li mala hewariyê bo 10 deqeyan hate sekinandin, bi wesayîta cenazeyan, ku xortan bi motorbiskilêtan refaqat kirin, ji bo veşartinê ber bi Goristana Küçük Obayê hate birêkirin. Nêzîkî 20 hezar kes tevî meşa cenaze bûn. Li gel dayîk, bav, xwîşk û birayên Alataş, endamên Meclîsa Partiyê ya BDP'yê, rêveberên BDP'yê, rêveberên rojnameya Azadiya Welat, endamên Meclîsa Giştî ya Bajêr û yên Meclîsa Şaredariyê, nûnerên TUHAY-DER, MEYA-DER, İHD’yê jî tevî meşê bûn.

Girseya ku tevî merasimê bû, piştî ku cenaze hate veşartin, bi awayekî bê deng belav bû û çû Mala Hewariyê ya Taxa Gulbahçesiyê.