Diyarname
Fîlmê bi kurdî "Min Dît" û "Du ziman û baholek" li Festîvala Fîlman a Porteqala Zêrîn a Antalyayê xelat girt. Her wiha di nav fîlmên kurdan ku beşdarî festîvalê bûbûn de, belgefîlmê "Girtîgeha bi Nimreya 5'an" û "Çiraxê Tamîrkar" jî xelat girtin.

Fîlmê "Min Dît" ê derhêner Miraz Bezar di warê "Xelata Taybet a Juriyê ya Behlul Dal" de xelat girt. Senarîsta fîlm Evrim Alataş di vî warî de bû xwediya xelatê.
Di dema xelatgirtinê de Alataş kurteaxaftineke kir û got: "Nîqaş li ser fîlm derketin, lê fîlm ne tişteke wisa ye. Ez vê xelatê wekî xelata biratiyê dibînim. Ez li ser navê zarokên li Amedê vê xelatê digirim."

Fîlmê din ê li ser kurdan û bi kurdî-tirkî "İki dil bin bavul (Du ziman û baholek)" ê derhêner Ozgur Dogan û Orhan Eskikoy e ku ev fîlm jî ji Antalyayê bi xelatê vegeriya. Derhêner Ozgur Dogan jî di axaftina xwe de wisa got: "Me ev fîlm ji bo mamosteyên ku li vî welatî zehmetiyên mezin dikişînin û ji bo xwendekarên wan kişand. Perwerdehiya zikmakî mafê her zarokî ye. Û em xelatê diyarî Ceylan Onkula ku firsend nedît zimanê duyemîn hîn bibe û hat kuştin dikin."

Di şevê de gelek xelat hatin belavkirin. Yek ji wan jî Xelata Fîlmê Herî Serketî bû ku fîlmê "Bornova Bornova" (Derhêner İnan Temelkuran),  fîlmê "Kosmos" (derhêner Reha Erdem) girt. Derhênerê "Bornovo Bornova"yê İnan Temelkuran jî ev yek anî ziman: "Ji bo ku li Tirkiyeyê em qîmetê didin kedê me ev fîlm kişand. Li ser qelişandinê ku em dibêjin jî ez vê bibêjim: Derbeya 12'yê Rezberê aswaltek kişand ser gel, ez hêvî dikim me hinekî ev aswalt qelaştibe."

Di merasima xelatdayînê derhênerê yewnanî yê navdar Theo Angelopolos jî Xelata Serketina di Hemû Jiyanê de girt.

Di beşa pêşbaziya belgefîlman de jî fîlmekî kurdan xelat girt. Derhêner Çayan Demirel bi belgefîlmê xwe "5 Nolu Cezaevi" (Girtîgeha bi Nimeya 5'an) ku li ser Girtîgeha Amedê kişandiye tevî belgefîlmê "Ziyaretçiler" ê Melis Birder Xelata Belgefîlmê Herî Serketî girt.

Di beşa kurtefîlman de jî xelat hatin berhevkirin. Di vê beşê de jî derhênerê kurd Cahit Çeçen xelat girt. Çeçen bi fîlmê xwe "Tamirci Çiragi (Çiraxê Tamîrkar)" digel sê kesên din Xelata Akademiya Fîlmên Dijital ku beramberî 3 hezar û 500 TL ye girt. Ev xelat ji bo kişandina fîlmê nû wekî alîkarî tê dayîn.

Vane xelatên ku di şevê de hatin belavkirin:

- Xelata Fîlmê Herî Serketî: İnan Temelkuran (Bornova Bornova), Reha Erdem (Kosmos)
- Xelata Derhênerê Herî Serketî: Kosmos (Derhêner Reha Erdem)
- Xelata Fîlmê Yekemîn yê Herî Serketî: İki Dil Bir Bavul (Derhêner: Orhan Eskikoy û Ozgur Dogan)
- Xelata Derhênerê Herî Serketî: Reha Erdem (Bi fîlmê xwe Kosmos)
- Xelata Lîstikvanê Herî Serketî: Onen Erkan (Bi rola di Bornova Bornova de)
- Xelata Lîstikvana Herî Serketî: Nergiz Ozturk (Bi rola di Kiskanmak de)
- Xelata Taybet a Juriyê: Kosmos (Derhêner Reha Erdem)
- Xelata Taybet a Juriyê ya Behlul Dal (Jîrekiya Ciwan): Bi fîlmê "Usta" Bahadir Karataş, bi fîlmê "40"  Emre Şahin, bi fîlmê "Min Dit" senarîst Evrim Alataş û bi fîlmê "Beş Şehir" lîstikvanê fîlm Tansu Biçergirt.
- Xelata Vesazkirina Herî Serketî: Erkan Çekemen (Bi fîlmê Bornova Bornova)
- Xelata Hunerê ya Herî Serketî: Zeynep Kologlu (Bi fîlmê Usta)
- Xelata Lîstikvanê Duyem ê Herî Serketî: Volga Sorgu (Bi rola di "Kara Kopekler Havlarken" de)
- Xelata Lîstikvana Duyem a Herî Serketî: Damla Sonmez (Bi rola di "Bornova Bornova" de)
- Xelata Muzîka Herî Serketî: Mehmet Erdem, Ozgul Akgur (bi muzîka fîlmê "Deli Deli Olmak")
- Xelata Dîmena Herî Serketî: Floran Haris (Bi fîlmê Kosmos)
- Xelata Senaryoya Herî Serketî: Onur Unlu (Bi senaryoya fîlmê "Beş Şehir")
- Xelata Serketina di Hemû Jiyanê de: Theo Angelopolos
- Xelata Belgefîlmê Herî Serketî: "Ziyaretçiler" (Derhêner Melis Birder) û "5 Nolu Cezaevi" (Derhêner Çayan Demirer)

***

- Nûçeyên eleqedar:

- Deqeya dawî: "Min Dît" û "Du ziman û baholek" xelat girt
- Li Antalyayê li ser "Mîn dît"ê nîqaş derket
- Fîlmên kurdî jî ketin dû Porteqala Zêrîn
- 'Bunun ismi ne?', 'Kew'

***

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.